3 տարի անց կառավարությունը տեղից շարժվեց

2008 թվականի աշնանը, երբ համաշխարհային տնտեսական ճգնաժամի մասին նոր էր խոսվում Հայաստանում, տնտեսագետ Թաթուլ Մանասերյանը դրան դիմակայելու եւ  դրանից նույնիսկ օգուտներ քաղելու համար մի քանի առաջարկություններ է արել կառավարությանը:

Առաջարկներից մեկն այն էր, որ նոր տեխնոլոգիաներ երկիր ներկրելու դեպքում այդ ապրանքները չհարկվեն, որպեսզի դրանցով հնարավոր դառնա զարգացնել ձեռնարկությունները եւ բարձրացնել արդյունաբերության մրցունակության մակարդակը:

Բանն այն է, որ  սովորական պայմաններում զարգացած որեւէ  երկիր չի վաճառի վերջին սերնդի տեխնիկան, սակայն ճգնաժամի փուլում սնանկացած ձեռնարկությունները (օրինակ` General Motors-ը) ստիպված պետք է հրաժարվեն գույքի գոնե այն մասից, որը չի աշխատում, դրանից շահույթ չի ստացվում, բայց դրա դիմաց գույքահարկ է վճարվում:

Սա հրաշալի հնարավորություն է` էժան գներով բարձրորակ տեխնիկա գնելու համար:

«Ցավոք, 3 տարի պահանջվեց, որպեսզի այս առաջարկը գտներ իր կիրառությունը: Եվ ուրախությամբ պիտի նշեմ, որ կառավարությունը վերջերս որոշում ընդունեց, որ ներմուծվող նոր տեխնիկան, սարքավորումները որոշ ժամանակահատվածում ազատվելու են հարկերից»,- ասաց Թ. Մանասերյանը: