Թուրքիան դանակով հարվածեց աշխարհի մահմեդականների թիկունքին

Իրանի ղեկավարությունը վրդովված է Էրդողանի` ՄԱԿ-ի Գլխավոր ասամբլեայի նստաշրջանում ելույթից եւ նրա «երկերեսանիությունից»:

Մեծ այաթոլլա Նասեր Մաքարեմ Շիրազին Թեհրանում ուրբաթօրյա աղոթքի ժամանակ հայտարարել է. «Թուրքիան դանակով հարվածեց աշխարհի մահմեդականների թիկունքին»: Ըստ նրա` թուրքական իշխանությունները հայտարարում են, թե ոչ մի բարեկամական կապ չունեն Իսրայելի հետ, սակայն գործերն այլ բան են ասում: Բացի այդ` «թուրքական պուդելները» շարժվում են իրենց ամերիկացի ու սաուդացի տերերի հրամաններով եւ քաղաքացիական պատերազմի կրակը գցում Սիրիան:

«Թեեւ իր ելույթում Էրդողանը քննադատեց ե'ւ սիրիական, ե'ւ իսրայելական իշխանություններին, նա ընդգծեց, որ Իսրայելի ժողովրդի հետ որեւէ խնդիր չունի, իր խնդիրը միայն իսրայելցի պաշտոնյաների հետ է: Ամենակարեւորը` նա նույնիսկ չհիշատակեց Իսրայելի հենասյանը` Ամերիկային, եւ նրա հանցագործությունները Աֆղանստանի ու Իրաքի ժողովուրդների դեմ: Էրդողանը նաեւ ոչ մի խոսք չասաց ի պաշտպանություն Պաղեստինի անմեղ ժողովրդի»,- հայտարարել է այաթոլլան: