Աննախադեպ մրցույթ` "Հայաստանը ես եմ"

ՀՀ անկախության 20-րդ տարեդարձի միջոցառումների պետական հանձնաժողովը եւ «Մեդիամաքսը» ներկայացնում են «Հայաստանը ես եմ» մրցույթը, որին կարող են մասնակցել 1990-91թթ. ծնված ՀՀ այն քաղաքացիները, ովքեր մրցույթի անցկացման պահին բնակվում են ՀՀ-ում:

Մրցույթն ունի մեկ մրցանակ` հաղթողը կուղեկցի ՀՀ նախագահին արտերկիր կատարվելիք այցերից մեկի ընթացքում: Հաղթողին կորոշի ՀՀ անկախության 20-րդ տարեդարձի միջոցառումների պետական հանձնաժողովի եւ «Մեդիամաքսի» համատեղ ժյուրին:

Մրցույթի մասնակիցներն իրենց ընտրությամբ կարող են ներկայացնել` էսսե (շարադրություն) (առավելագույն ծավալը` 500 բառ կամ 1.5 էջ` «Հայաստանը ես եմ» թեմայով, լուսանկար կամ լուսանկարների շարք (մինչեւ 6 լուսանկար) եւ տեսահոլովակ (առավելագույն տեւողությունը` 3 րոպե)` «Հայաստանը ես եմ» թեմայով:

Հեղինակները պետք է երաշխավորեն, որ ներկայացված աշխատանքների հեղինակային իրավունքներն իրենց են պատկանում:

Ներկայացված բոլոր աշխատանքները կհրապարակվեն «Մեդիամաքս»-ի կայքում բացված հատուկ`http://www.mediamax.am/am/specialprojects/contest բաժնում, բացառությամբ այն աշխատանքների, որոնք ակնհայտորեն չեն համապատասխանի մրցույթի պայմաններին:

Մրցույթի ընթացքին ու ստացվող աշխատանքների հրապարակմանը, ինչպես նաեւ հետադարձ կապի պահպանման համար անհրաժեշտ է գրանցվել Facebook սոցիալական ցանցի «Մեդիամաքս»-ի էջում ` https://www.facebook.com/Mediamax.am:

Մրցույթը մեկնարկում է սեպտեմբերի 5-ին, աշխատանքների ընդունումը կտեւի մինչեւ սեպտեմբերի 20-ը, իսկ մրցույթի հաղթողի անունը կհրապարակվի սեպտեմբերի 26-ին: