Ադրբեջանի եւ Թուրքիայի հարաբերությունները լարված են

Թուրքիայի եւ Ադրբեջանի հարաբերությունները հիմա բավական վատ վիճակում են. այսօր լրագրողների հետ հանդիպման ժամանակ համոզմունք հայտնեց Տարածաշրջանային հետազոտությունների կենտրոնի ղեկավար Ռիչարդ Կիրակոսյանը:

Նրա խոսքերով` իրականում Թուրքիայի`  տարածաշրջանի եւ Հայաստանի հետ շփվելու խնդիրը ոչ թե Երեւանն է, այլ հենց Ադրբեջանը:

Թուրքիան նորմալ չի ընդունել նաեւ Ադրբեջանի մեղքով կազանյան հանդիպման տապալումը: «Դա եւս մեկ անգամ ցույց տվեց թուրքական կառավարությանը, որ Ադրբեջանն է պրոբլեմը, եւ իրականում թուրք արտգործնախարարությունը բավականին զայրացած է Բաքվի վրա»,- ասաց նա` հիշեցնելով, որ Ադրբեջանը եւս մեկ անգամ սպառնացել է կտրել Թուրքիայի գազը:

«Տպավորություն է, որ կրտսեր եղբայր Ադրբեջանը, ավագ եղբորը` Թուրքիային, թելադրում է, թե ինչ անի կամ չանի  տարածաշրջանում, ինչը զայրացնում է Թուրքիային»,- ասաց Ռ. Կիրակոսյանը:

Քաղաքագետը պնդում է, որ լարված են նաեւ Ալիեւի եւ Էրդողանի հարաբերությունները, եւ Թուրքիայում որեւէ մեկն այդ փաստը չի թաքցնում: