Հունիսի 1-ը երեխաների պաշտպանության միջազգային օրն է

Հունիսի 1-ը երեխաների պաշտպանության միջազգային օրն է:

Երեխաների պաշտպանության միջազգային օրը հռչակվել է 1925-ին` Ժնևում երեխաների պաշտպանության համար հրավիրված համաշխարհային կոնֆերանսի ժամանակ: 1949թ. Կանանց ժողովրդավարական միջազգային դաշինքը երեխաների պաշտպանության օր անցկացնելու որոշում է ընդունել:

ՄԱԿ-ը, հավանություն տալով այս նախաձեռնությանը, հայտարարել է, որ երեխաների կյանքի և առողջության պաշտպանության հարցն իր գործունեության գերակա ուղղություններից մեկն է:

Առաջին անգամ հունիսի 1-ը նշվել է որպես երեխաների պաշտպանության միջազգային օր 1950-ին:

Երեւանի քաղաքապետարանը օրվա առիթով կազմակերպել է մի շարք միջոցառումներ` վարչական բոլոր շրջաններում:

Բացի այդ, մի շարք հասարակական կազմակերպություններ նույնպես կազմակերպել են հետաքրքիր միջոցառումներ`սպասելով երեխաների ակտիվ մասնակցությանը:

Երևանի կենդանաբանական այգում կկազմակեպվի համահայկական մանկական նկարչական օր, որին կարող են մասնակցել այգի այցելող բոլոր երեխաները. մինչև 16 տարեկան երեխաների համար կենդանաբանական այգի մուտքը կլինի անվճար:

Մոսկովյան պուրակում կկազմակերպվի համերգ և ցուցահանդես-վաճառք: Կցուցադրվեն արյան հիվանդություններով տառապող երեխաների ձեռքի աշխատանքները:

Սիրահարների այգում տեղի կունենա «Պաշտպանենք երեխաներին տարին ոչ մեկ օր» խորագրով լուսանկարչական աշխատանքների ցուցահանդեսը:

Երեխաների պաշտպանության օրվան նվիրված միջոցառում տեղի կունենա նաեւ Անգլիական այգում: Միջոցառմանը հրավիրված են Վանաձորի մանկատան երեխաները, որոնց համար կկազմակերպվի ուրախ ժամանց:

«Գաֆէսճեան» արվեստի կենտրոնում կմեկնարկի Երեխաների պաշտպանության միջազգային օրվան նվիրված ուրախ տոնակատարություն: