Մամուլի մահվան դա՞ր

Վերջերս համաշխարհային փորձագետները եզրահանգել են, որ 21-րդ դարը կլինի տպագիր մամուլի «մահվան դար», դրա տեղը կզբաղեցնի օնլայն եւ բլոգային լրագրությանը:

Մամուլի ազատության օրվա առթիվ «Երկիր»-ը փորձեց ճշտել, թե ինչքա՞ն կդիմանան հայկական տպագիր մամուլը, երբ օրեցօր նկատելի է դառնում, որ համացանցում ավելանում են նորանոր հայկական լրատվական կայքեր եւ բլոգներ:

«Առավոտ» օրաթերթի գլխավոր խմբագիր Արամ Աբրահամյանի կարծիքով`  առաջիկա տարիներին, բնականաբար, օնլայն լրատվամիջոցները կզարգանան, ինչի հետեւանքով կնվազի տպագիր մամուլի տպաքանակը. «Դա ակնհայտ նկատելի կլինի ոչ միայն Հայաստանում, այլ նաեւ ամբողջ աշխարհում: Սակայն հագեցնելով ինչ-որ մի պահանջարկ` այնուամենայնիվ, ընթերցողը կարիք կունենա պրոֆեսոնալիզմի, այսինքն` լրագրողների, եւ մարդիկ ավելի կզգան դրա կարիքը: Կարծում եմ, որ կլինեն զուգահեռ զարգացումներ, ինչպես նաեւ վայրիվերումներ, բայց  ո'չ գիրքը եւ ո'չ էլ թերթը վերջնականապես չեն մահանա»:

«Երկիր Մեդիա» հեռուստաընկերության լրատվական ծրագրերի ղեկավար Գեղամ Մանուկյանի կարծիքով` ներկայիս հայկական լրատվական կայքերն իրականում այն չեն, ինչ հարկավոր է. «Եթե փորձի համար երեկոյան բացենք հայկական հինգ լրատվական կայքեր, ապա կտեսնենք, որ այդ հինգ առաջատար օնլայն լրատվամիջոցների կայքերում տեղեկատվությունը copy-past է արված: Այսինքn` մի լուրը հայտնվել է ինչ-որ կայքում եւ պատճենվել է մյուսներում»:

Ըստ նրա` տպագիր մամուլը ուրիշ է եւ յուրովի մեկնաբանություններ ունի. «Մեր թերթերում բացակայում է սյունակագիր հասկացությունը: Ներկայիս հայկական տպագիր մամուլից միայն «Առավոտ» թերթում է, որ հանդիպում ենք սյունակագիր հասկացությանը»:

Իսկ «Երկիր»-ի հարցումները մայրաքաղաքի փողոցներում պարզեցին, որ այսօր հասարակությունը լրատվամիջոցներից վստահում է տպագիր մամուլին, սակայն ոչ բոլորին է այն հասանելի. բոլորը միաբերան նշեցին, որ հիմնականում տեղեկատվություն են ստանում հեռուստատեսային լրատվական հաղորդումներից: