Ջահերով երթ` Թբիլիսիում

Ապրիլի 23-ին Թբիլիսիում կայացավ ավանդական ջահերով երթը` նվիրված Օսմանյան Թուրքիայում իրականացված Հայոց ցեղասպանության 96-րդ տարելիցին: Երթն ավարտվեց Վրաստանում Թուրքիայի դեսպանատան առջև, որտեղ ակցիայի մասնակիցները իրենց բողոքը հայտնեցին Ցեղասպանության թուրքական ժխտողական քաղաքականության կապակցությամբ:

Միջոցառման նախաձեռնողն ու կազմակերպիչը «Վրաստանի Հայ Համայնք» հասարակական կազմակերպությունն է: Ջահերով երթին միացել են «Վրաստանի Հայկական համագործակցության կենտրոն», «Վրաստանի Հայ ուսանողների միություն», «Վրաստանի Հայ երիտասարդական միություն», «Վրաստանի Հայ պատանեկան միություն» հասարակական կազմակերպությունները, իսկ բողոքի ակցիային Թուրքիայի դեսպանատան առջև` նաև վիրահայ այլ կազմակերպություններ:

Միջոցառմանը մասնակցում էր շուրջ 100 մարդ: Հավաքի մասնակիցների հիմնական պահանջը Թուրքիայի իշխանությունների կողմից Հայոց ցեղասպանության ժխտման դադարեցումն էր:

Հաջորդ օրը` ապրիլի 24-ին Վրաստանում Թուրքիայի դեսպանատան առջև տեղի ունեցավ  բողոքի խաղաղ ցույց` Հայոց ցեղասպանության ճանաչման պահանջով:

Ֆոտոռեպորտաժը դիտել այստեղ