Ֆրանսիան ժամանակավորապես դուրս է գալիս Շենգենից

Ֆրանսիայի կառավարությունը որոշում է ընդունել ժամանակավորապես դուրս գալ Շենգենյան տարածքից: 

Այս մասին հաղորդում են ֆրանսիական լրատվամիջոցները` հղում կատարելով նախագահական նստավայրի իրենց աղբյուրներին: Պատճառն այն է, որ այլ եվրոպական երկրներից Ֆրանիսա են ներգաղթում մեծաթիվ լիբիացիներ եւ թունիսցիներ: 

Ինչպես գրում է L'Express-ը, Ֆրանսիայի նախագահին դուր չի գալիս Շենգենյան պայմանագիրն այն տեսքով, որ ներկայումս գոյություն ունի, քանի որ այն թույլ չի տալիս կանխել մեծաթիվ ներգաղթյալների մուտքը Ֆրանսիա: Այդ պատճառով կառավարությունը որոշում է ընդունել դադարեցնել Շենգենյան պայմանագիրը, քանի դեռ այս խնդիրը լուծում չի ստացել:

Հիշեցնենք, որ արաբական երկրներում տեղի ունեցող ապստամբությունների և հեղափոխությունների պատճառով տեղի իշխանություններն ի վիճակի չեն վերահսկել ներգաղթյալների մեծ հոսքը դեպի Եվրոպայի հարավային երկրներ` հիմնականում Իտալիա: Եվ այս պատճառով մի քանի տասնյակ հազար մարդու հաջողվել է անօրինական ներխուժել Շենգենյան տարածք:

Իտալիան, ի վիճակի չլինելով ընդունել այս քանակության ներգաղթյալներ, թույլատրել է նրանց ժամանակավոր մուտք գործել Շենգենյան տարածք: Սա էլ ինչը հարուցել է հարևան երկրների եւ հատկապես Ֆրանսիայի դժգոհությունը: