Դարձյալ հացի գնաճի մասին

Հացի գնաճի կարգավորմանն ուղղված աշխատանքները Արցախում շարունակվում են:

Այժմ հարցը հայտնվել է Հանրային ծառայությունները եւ տնտեսական մրցակցությունը կարգավորող հանձնաժողովի ուշադրության կենտրոնում:

Երեկ հանձնաժողովի հրավիրած նիստում հացի ապրանքային շուկայում գերիշխող դիրք ունեցող են ճանաչվել «Էռմի» ՓԲԸ-ն, «Մայակ» եւ «Կառավայ» ՍՊԸ-ները: Այս 3 ընկերությունները իրացման համատեղ ծավալներով զբաղեցնում են տվյալ շուկայի առնվազն մեկ երկրորդը` 52,3%-ը:

Նշված ընկերությունները հանձնաժողովի կողմից սահմանված կարգով այսուհետ պարտավոր են վեցամսյա պարբերականությամբ հանձնաժողովին ներկայացնել տեղեկատվություն` տվյալ ապրանքային շուկայում իրենց կողմից իրացված (ձեռք բերված) ապրանքների ծավալի, ծախքերի կառուցվածքի եւ գների շարժի (գնային փոփոխությունների դեպքում` համապատասխան հիմնավորումներով) վերաբերյալ:

Նիստում տեղեկացվել է, որ հանձնաժողովի կողմից ուսումնասիրություն է կատարվել հացի շուկայում, որի արդյունքում պարզվել է, որ հացի իրացման գների բարձրացում է արձանագրվել: Իրականացվել են նաեւ ուսումնասիրություններ հաց արտադրող ընկերություններում, պահանջվել է տեղեկանք տվյալ ապրանքատեսակի գների հիմնավորվածության վերաբերյալ: Արդյունքում` հիմնավորվել է, որ գնագոյացումը իրականացվել է ներմուծվող ալյուրի գների բարձրացմանը համապատասխան:

Ուսումնասիրություններից պարզվել է, որ հացի թանկացումը  հակամրցակցային համաձայնության արդյունք չէ: «Քանի որ հացի շուկան սոցիալական կարեւոր նշանակություն ունի, շուկայի բոլոր մասնակիցների կողմից կիրառվող գնային քաղաքականության նկատմամբ լինելու է մշտական հսկողություն` գների մակարդակի վրա ազդող տարբեր գործոնների ազդեցության առումով դրանց համահունչ առաձգականությունը ապահովելու նպատակով»,- հավաստիացրել են հանձնաժողովում:

Տեղեկացնենք, որ Ստեփանակերտի խանութներում սովորական մատնաքաշի գինը 120-130 դրամ է: