Առաջին ուղեւորը կլինի Հայաստանի նախագահը

Լեռնային Ղարաբաղի բնակչությունն իրավունք ունի օգտվել օդային տրանսպորտից, եւ դա սակարկման ենթակա չէ. այսօր Շվեյցարիայի նախագահ Միշելին Քալմի-Ռեյի հետ հետ համատեղ ասուլիսում, ի պատասխան հայկական ինքնաթիռները ոչնչացնելու` ադրբեջանական սպառնալիքների, հայտարարել է Հայաստանի նախագահ Սերժ Սարգսյանը:

Նա հավելել է, որ Արցախի եւ Հայաստանի իշխանությունները մտադիր են ջանքեր գործադրել, որ այդ հարցը համաձայնեցվի միջազգային ատյանների հետ, եւ համոզմունք է հայտնել, որ նախաձեռնությունը հաջողությամբ կպսակվի:

Ինչ վերաբերում է Բաքվի հայտարարությանը, նախագահը նշել է, որ նորագույն պատմության ընթացքում սպառնալիքներ շատ են հնչել, սակայն դրանք հնչեցրել են ահաբեկչական կազմակերպություններ, այլ ոչ թե պետություններ:

«Ես հայտարարում եմ, որ առաջին չվերթի առաջին ուղեւորը լինելու եմ ես` Հայաստանի նախագահը»,- հայտարարել է Սերժ Սարգսյանը: