Հայաստանում կա՞ մեկը, ով կպատասխանի մեր հարցին

Արդյո՞ք Հայաստանին էլ է սպառնում ճապոնական «Ֆուկուսիմա-1» ատոմակայանից արտանետված ռադիոակտիվ յոդը: «Հայպետհիդրոմետ»-ի օպերատիվ կանխատեսումների բաժնի պետ Զարուհի Պետրոսյանը, ԵՐԿԻՐ-ի հարցը մինչեւ վերջ չլսելով, ասաց, որ չի կարող պատասխանել. «Այդպես էլ կարող եք գրել` ես չեմ պատասխանի»:

Ռադիոակտիվ յոդի հնարավոր վտանգի մասին հարցն ուղղեցինք նաեւ արտակարգ իրավիճակների նախարարությանը, այստեղ էլ պատասխանեցին, որ դրա համար մեր երկրում պատասխանատու է միայն Միջուկային անվտանգության կարգավորման պետական կոմիտեն:

Զանգահարեցինք, սակայն մեզ ասացին, որ իրենք միայն միջուկային անվտանգության հարցերի կարգավորմամբ են զբաղվում, եւ որ այդ հարցն ավելի ճիշտ կլինի ուղղել առողջապահության նախարարությանը: Այստեղ էլ ասացին, որ օդի աղտոտվածության մոնիտորինգն իրականացնում է բնապահպանության նախարարությունը:

Բնապահպանության նախարարության «Հայէկոմոնիտորինգ» կենտրոնի տնօրեն Բաղդասար Սնգրյանն էլ մեզ ասաց, որ այդ հարցը չի մտնում իրենց գործառույթների մեջ, եւ իրենց անցկացրած մոնիտորինգն ամենեւին կապ չունի ճապոնական յոդի հետ:

Հետաքրքիր է` Հայաստանում կա՞ մեկը, ում կարող ենք դիմել այս հարցով: