Հայ ռազմագերիներին երրորդ երկիր են տեղափոխել

Ադրբեջանի կողմը կամավոր անցած երեք հայ զինվորներին ուղարկել են երրորդ երկիր. տեղեկացնում է 1news.az ադրբեջանական կայքը` վկայակոչելով Ռազմագերիների, պատանդների եւ անհայտ կորածների հարցերով պետական հանձնաժողովի աշխատանքային խմբի քարտուղար Շահին Սայըլովին:

Նրա խոսքերով`2009 թվականի փետրվարին ադրբեջանական կողմին հանձնված Հրանտ Մարկոսյանը, Ռաֆիկ Թեւոսյանը, Վարդան Սարգսյանը, իրենց ցանկությամբ եւ ՄԱԿ-ի միջնորդությամբ, վերջերս տեղափոխվել են երրորդ երկիր:

Սայըլովը նաեւ նշել է, որ ներկայումս Ադրբեջանում պահվում են 3 հայ ռազմագերիներ եւ 6 քաղաքացիական անձինք:

Հիշեցնենք, որ այսօր, Կարմիր խաչի երեւանյան գրասենյակի աջակցությամբ, ադրբեջանական կողմի ներկայացուցիչներին է հանձնվելու Ադրբեջանի` ԼՂՀ տարածքում ձերբակալված սահմանախախտ քաղաքացի: Իսկ ադրբեջանական կողմը հայկական կողմին է հանձնելու մեկ քաղաքացիական անձի, ըստ ադրբեջանական լրատվամիջոցների`2009 թվականի մայիսի 9-ին գերված Արթուր Գրիշայի Բադալյանին: