Հայ ռազմագերիներին հանձնել են երրորդ երկրի

Ադրբեջանն իսկապես երեք հայ ռազմագերիների վերջերս տեղափոխել է երրորդ երկիր. ԵՐԿԻՐ-ի խնդրանքով այս տեղեկատվությունը հաստատեց Կարմիր խաչի միջազգային կազմակերպության երեւանյան գրասենյակը` միաժամանակ նշելով, որ երրորդ երկրի ռազմագերիներին հանձնելու գործընթացը դուրս է իրենց մանդատից, իրականացվում է ՄԱԿ-ի միջնորդությամբ:

Հիշեցնենք, որ այսօր ադրբեջանական լրատվամիջոցները, վկայակոչելով Ռազմագերիների, պատանդների եւ անհայտ կորածների հարցերով պետական հանձնաժողովի աշխատանքային խմբի քարտուղար Շահին Սայըլովին, տեղեկություն էին տարածել, թե 2009 թվականի փետրվարին կամավոր կերպով ադրբեջանական կողմին հանձնված 3 հայ զինվորները` Հրանտ Մարկոսյանը, Ռաֆիկ Թեւոսյանը, Վարդան Սարգսյանը, իրենց իսկ ցանկությամբ վերջերս տեղափոխվել են երրորդ երկիր:

Սայըլովը նաեւ հայտնել էր, որ ներկայումս Ադրբեջանում պահվում են 3 հայ ռազմագերիներ եւ 6 քաղաքացիական անձինք: