ՀԱՅԿԱԿԱՆ ԺԱՄԱՆԱԿ. Ողջ-առողջ է

Մատենադարանի մոտ երեկ տեղի ունեցած Հայ ազգային կոնգրեսի հանրահավաքի ժամանակ, երբ ելույթ էր ունում հիմնադիր նախագահ Լեւոն Տեր-Պետրոսյանը, արտառոց միջադեպ տեղի ունեցավ: Մի քաղաքացի ուշաթափվեց, ընկավ ու վնասեց գլուխը:

Քաղաքացուն  հանրահավաքի մասնակիցները մի քանի րոպե շարունակ չէին կարողանում ուշքի բերել: Տեր-Պետրոսյանը ստիպված եղավ ընդհատել  իր ելույթը եւ խնդրել, որ շտապ օգնության բժիշկները մոտենան:

Հանրահավաքի մասնակիցները շատ արագ քաղաքացուն դուրս հանեցին ժողովրդի միջից եւ տեղավորեցին շտապօգնության մեքենայի մեջ: Սույն միջադեպից հետո, սակայն, որոշ լրատվամիջոցներ  շտապեցին ապատեղեկատվություն տարածել, թե ՀԱԿ-ի հանրահավաքի ժամանակ մարդ է հանկարծամահ եղել եւ նրան   օգնություն չի ցուցաբերվել:

«Շտապօգնության» պետ Ռ. Աբրահամյանը երեկ մեզ փոխանցեց, որ քաղաքացուն իրենք տեղափոխել են Համալսարանական կլինիկական 1-ին հիվանդանոց: Այստեղից մեզ հայտնեցին, որ քաղաքացին 1958 թվականին ծնված Խաչատուր Գրիգորյանը, իրենց մոտ է տեղափոխվել 18:45-ին, իսկ 21:00-ին իր ոտքով տուն է գնացել: