Մեդվեդեւի հայտարարությունը "ցինիկ" է

Վրաստանի արտգործնախարարությունը բողոքել է Ռուսաստանի նախագահի այն հայտարարության դեմ, թե Սոչիում կայանալիք օլիմպիական խաղերի նախաշեմին հարկավոր է «վերահսկողության տակ առնել» Վրաստանին: Այդ մասին մամուլի ասուլիսի ժամանակ ասել է Վրաստանի փոխնախարար Նինո Կալանդաձեն:

«Դուք ինքներդ էլ հասկանում եք, որ կան որոշակի խնդիրներ` կապված հարեւան Վրաստանի հետ: Այս իսկ պատճառով էլ պետք է արվի այն ամենը, ինչ պահանջվում է արտգործնախարարությունից, իրավապահ մարմիններից, ուժային կառույցներից: Եվ ցանկացած սադրանք պետք է համապատասխան կերպով կանխվի»,- ուրբաթ օրն ասել էր Մեդվեդեւը:

Կալանդաձեն հայտարարել է, որ այս հայտարարությունը վրացական կողմին զգոնացրել է. «Վրաստանի վերաբերյալ հայտարարություններ մինչ այս էլ հնչել են: Երբ բոլորին հայտնի է, որ օլիմպիադայի նախապատրաստական աշխատանքները կատարվում են նորմերի կոպիտ խախտումներով, ապա դա ցինիկություն է: Պետք է հաշվի առնել նաեւ այն, որ սադրիչ հայտարարությունները հնչում են հենց բարձր ատյաններից, ինչը շատ վտանգավոր է». հաղորդում է Газета.Ru-ն: