Ստախոս, ցինիկ, հաչացող, անասուն...Կիսելյովի պատճառով պատգամավորները վիճեցին

Այսօր ԱԺ նիստում ռուս լրագրող Կիսելյովի անթույլատրելի պահվածքին անդրադարձավ ԱԺ պատգամավոր, նախկին ԱԳ նախարար Ալեքսանդր Արզումանյանը: Մինչ այդ` ԱԺ փոխնախագահ Հերմինե Նաղդալյանը փորձեց ներկայացնել, թե ոչ մի սարսափելի բան տեղի չի ունեցել այդ նիստի ընթացքում, որին ներկա էր Կիսելյովը, պարզապես մարդիկ տարբեր կարծիքներ են հնչեցրել:

Ալեքսանդր Արզումանյանը նշեց. «Տիկի'ն Նաղդալյան, բազմակարծությունը լավ բան է, ուրեմն պետք է այդ նիստին հրավիրեիք իսկապես տարբերվող կարծիքներ ունեցող պատգամավորներին, որ կարողանային պատասխան տալ Կիսելյովին: Իսկ պարոն Բաբուխանյանը ուղղակի ստում է, որովհետև այդ հանդիպումն ամբողջությամբ տեղադրված է համացանցում, որտեղ հստակ երևում է, որ հայ ժողովրդի հասցեին վիրավորական և հայոց պետականությանը սպառնացող մի շարք ցինիկ արտահայտություններ են արվել»:

Պատգամավորը հարկ համարեց հիշեցնել, որ «ցինիկ» բառի արմատը շուն բառն է, այսինքն` ցինիկ են անվանում այն մարդկանց, ովքեր շան պես հաչում են` փորձելով վիրավորել հասարակությանը: «Պահանջում ենք հետայսու զերծ պահել խորհրդարանը հաչոցներից»,- ասաց Ալեքսանդր Արզումանյանը:

Հայկ Բաբուխանյանի ու Ալեքսանդր Արզումանյանի միջև վեճ սկսվեց: Հայկ Բաբուխանյանը տեղից բղավեց. «Ստախոսն էլ ես, ցինիկն էլ ես, հաչացողն էլ ես, անասո'ւն»:

Գալուստ Սահակյանը փորձեց հանգստացել պատգամավորներին` ասելով, որ պետք չէ պատերազմել: