Պետությունն անկարող է շտկել իրավիճակը

Տիգրան Կարապետյանի հանրահավաքներն ու քաղաքապետարանի մոտ տեղի ունեցող բողոքի ակցիաները ԱԺ ՀՅԴ խմբակցության պատգամավոր Լիլիթ Գալստյանը տրամաբանական է համարում, քանի որ ժողովրդի համբերության բաժակը լցվել է, իսկ պետությունն անկարող է շտկել իրավիճակը: «Սկսած ձվի գնի կարգավորման անկարողությունից, թոշակառուների թոշակները բաժանելու անհարթություններից, հասկանալի է դառնում որ պետությունն ի զօրու չէ երկիրը դուրս բերել առկա վիճակից. սա իսկական անկարողություն է»,- հայտարարեց  պատգամավորը:

Նա նշեց, որ Հայաստանում հասարակական-քաղաքական կյանքը հետընթաց է ապրում, ինչից էլ պետության վախճանի զգացողություն է առաջանում: «2011-ի բյուջեն լավագույնս արտահայտում է այն փիլիսոփայությունը և քաղաքական արժեքների այն համակարգը, որով առաջնորդվում են մեր իշխանությունները»,- ասաց Լիլիթ Գալստյանը:

Անդրադառնալով Թունիսի եւ Եգիպտոսի օրինակով Հայաստանում սոցիալական ընդվզումների սկսման հավանականությանը, դաշնակցական պատգամավորն ասաց, որ ինքը ցավով է հետեւում այդ իրադարձություններին: «Աստված չանի, որ նման կացություն ստեղծվի նաեւ Հայաստանում, որովհետեւ սոցիալական համերաշխությունը մեզ համար կարեւոր խնդիր է։ Շատ ավելի ճիշտ կլինի, եթե ներքին բունտը կարողանանք վերաձեւակերպել քաղաքացիների պահանջատիրության, բարձր քաղաքացիական գիտակցության»,- նշեց նա։

ՀՀԿ-ական Մանվել Բադեյանն էլ ասաց, որ նույնիսկ ամենազարգացած երկրներում են խռովություններ լինում, իսկ Հայաստանն արաբական երկրների հետ համեմատելն անտրամաբանական է, քանի որ «մենք արաբ չենք»: