ՀԱՅԿԱԿԱՆ ԺԱՄԱՆԱԿ. Ժողովրդի ջանից

Ըստ որոշ տեղեկությունների` անհատ վաճառականների կողմից Թուրքիայից ներկրվող ապրանքների մաքսազերծման հետ կապված խնդիրները հարուցվել են կառավարության գիտությամբ եւ հորդորով`  պետբյուջեի մուտքերը լրացնելու նպատակով:

Խնդիրն այն է, որ ներմուծվող  ապրանքների մաքսազերծումից ստացվող  բյուջետային մուտքերն անցած տարի խիստ ցածր են եղել: Դրանք ավելացնելու համար կառավարական օղակներում որոշում է կայացվել առանց մաքսազերծման պաշտոնական չափը փոփոխելու մեծացնել մուտքերը:

Պետք է ստացվի այնպես. որ անհատ վաճառականների ապրանքները Հայաստան հասցնող եւ մաքսազերծման հարցում «օգնող»  միջնորդները այլ հարկատեսակներով ավելի շատ հարկեր վճարեն: Դա, իհարկե չէր  կարող չանդրադառնալ վաճառականներին նշված ծառայությունների մատուցման գնի վրա:

Բայց վերջին պահին վաճառականների բողոքներից հետո կառավարությունը «քցել է» նշված միջնորդներին` սակագնի բարձրացման մեղքն ամբողջությամբ բարդելով նրանց վրա: Սա է պատճառը, որ միջնորդներ չեն կարողանում բացատրել, թե ինչու են վաճառականներից ավելի շատ փող վերցնում: