Մանկական Եվրատեսիլը` Երեւանում

Մանկական Եվրատեսիլ-2011-ն անցկացվելու է Հայաստանում` դեկտեմբերի 3-ին: Այսօր լրագրողների հետ հանդիպմանը հայտարարել է Հայաստանում համեվրոպական երգի մրցույթի պատվիրակության ղեկավար Գոհար Գասպարյանը: Նրա խոսքով, մրցույթին ներկայացված է եղել 4-5 պետություն, որոնք ցանկություն են հայտնել հյուրընկալել Մանկական Եվրատեսիլը, սակայն Հայաստանի առաջարկը լավագույնն է ճանաչվել:

Եվրատեսիլի երեւանյան մրցույթն անցկացվելու է մարզահամերգային համալիրում: Ծրագիրը ղեկավարելու է շվեդ պրոդյուսեր Բո Վահլերբերգը: Հայաստանյան ներկայացուցիչները համագործակցելու են HD Resources կազմակերպության հետ, իսկ Եվրոպական հեռարձակողների միությունն էլ տրամադրելու է հեռարձակման համար նախատեսված տեխնիկական միջոցների մի մասը:

Հանրային հեռուստառադիոընկերության խորհրդի նախագահ Ալեքսան Հարությունյանն էլ, իր հերթին, տեղեկացրել է, որ Հայաստանի եվրոպացի գործընկերներն արդեն ժամանել են Հայաստան: «Նրանք տպավորված են մարզահամերգային համալիրից, տեխնիկական բազայից, անձնակազմից»,- ասել է Ալեքսան Հարությունյանը: Հարցին, թե արդյոք Ադրբեջանը մասնակցություն ունենա մրցույթին, Ալեքսան Հարությունյանն ասել է, որ Ադրբեջանը երբեք չի մասնակցել մրցույթին, բայց դեռեւս ժամանակ կա եւ հնրավոր է, որ մասնակցության հայտ դեռ ներկայացնի:

Հնարավոր է, որ մրցույթին հրավիրվեն նաեւ համաշխարհային մեծության աստղեր: