Փղնդեզ

Այսօր նշվում է փղերի տոնը` Փղնդեզը: Արդեն չորրորդ տարին է, ինչ այս օրը  բլոգներում եւ սոցիալական որոշ ցանցերում նշվում է տոնը, որը բավականին լայն տարածում է գտել ու վիրտուալ մակարդակից տեղափոխվել իրականություն:

Չորս տարի առաջ նոյեմբերի 29-ին հայ առաջատար բլոգերներից Տիգրան Քոչարյանը (pigh.tv) որոշեց ու կազմակերպեց փղերին նվիրված ակցիա-տոնակատարությունը:

«Աշնան վերջին օրն է, ու պետք է ձմեռն ուրախ դիմավորել: Բացի դրանից` նման ֆլեշմոբերը լիցքաթափում են մարդկանց, քանի որ մեկ-մեկ շատ լարված իրավիճակներ են լինում` կապված քաղաքական իրադարձությունների հետ: Հաճախ վեճեր են լինում, իսկ նման միջոցառումների ժամանակ հանգստանում են»,- ասաց Փիղը` Տիգրան Քոչարյանը:

Նոյեմբերի  30-ին մարդիկ իրենց բլոգներում գրառումներ են անում փղերի մասին` հետաքրքիր պատմություններ, անեկդոտներ, տեղադրում նկարներ, բացիկներ, տեսահոլովակներ և այլն:

Իսկ երեկոյան տոնը նշում են արդեն իրական եւ ոչ վիրտուալ կյանքում: