Կոալիցիան քաղբանտարկյալների ազատ արձակման հարցը չի՞ քննարկում

Այսօր «Հայկական ժամանակ» օրաթերթում տպագրվել էր «Բարգավաճ Հայաստան» խմբակցության քարտուղար Արամ Սաֆարյանի հայտարարությունն այն մասին, որ իշխող կոալիցիան քննարկում է քաղբանտարկյալներին ազատ արձակելու հնարավորության հարցը: Հարցի առնչությամբ Եվրախորհրդի խորհրդարանական վեհաժողովում հայաստանյան պատվիրակության ղեկավար, Ազգային ժողովի պետաիրավական հարցերի հանձնաժողովի նախագահ Դավիթ Հարությունյանն ասաց, որ ինքը կոալիցիայի ներսում որևէ նման քննարկման մասին տեղեկացված չէ: «Ես տեղյակ չեմ, թե ինչ հիմքի վրա է պարոն Սաֆարյանը նման հայտարարություն արել»,- ասաց նա: ՕԵԿ մամլո խոսնակ Արթուր Միսակյանը տեղեկացրեց, որ կոալիցիայում քաղբանտարկյալների հարցը չի քննարկվել: «ՕԵԿ-ն այդ հարցը քննարկելու առաջարկություն չի ստացել»,- ասաց նա: