Համազգայնի Մարսելի մասնաճյուղի «Արվեստի հոսանքներ» մշակութային միությանը նոր էջը. գրքի տոնավաճառի երկօրյա տոն՝ Համազգայնի ճեմարանի սրահում

Համազգայինի Մարսելի մասնաճյուղի «Արվեստի հոսանքներ» (Courents d’Art) մշակութային միությունը այս տարի նշում է իր գործունեության 30-ամյակը՝ շարունակելով կարևորել սփյուռքահայ նոր սերնդի հայեցի մշակութային կրթության իր առաքելությունը։ Միությունը միավորում է գեղանկարչության, երաժշտության, պարային և այլ դպրոցներ, որոնցով նոր տասնամյակը սկսում է նոր թափով, նորովի հագեցված, նորոգված տեսլականով, բայց և՛ միշտ, և՛ միշտ նույն նպատակով. այն է՝ ապահովել հայոց լեզվի, հայ արվեստի և հայ ինքնության բնական ներկայությունը մարսելահայության առօրյայում։

Վերջին չորս տարիներին «Արվեստի հոսանքները» կազմակերպում է, ի շարս այլոց, նաև գրքի տարեկան ցուցահանդես-տոնավաճառ, որը դարձրել է համագործակցության հարթակ՝ ընդգրկելով Բեյրութից, Պոլսից և Ֆրանսիայի տարբեր քաղաքներից հայ գրողներ ու հրատարակչական տներ։

Միության պատասխանատուները նշում են, որ առաջիկա տարիներին նախատեսում են համայնքին ներկայացնել նոր ծրագրեր ու գրական նոր ընտրանի։

Համազգայինի «Արվեստի հոսանքներ» մշակութային միության վարչության անդամ Թամար Իշճին շեշտում է, որ իրենց նպատակը լեզվի և մշակույթի պահպանումն է, որպեսզի աշակերտները իրենց տան գրադարաններում ո՛չ միայն ֆրանսերեն, այլ նաև հայերեն գրքեր ունենան։ «Սա մեզ համար շատ կարևոր է»,— բացատրում է նա։

«Ճանապարհորդելիս միշտ նոր գրքեր ենք բերում՝ Հայաստանից, Լիբանանից, Պոլսից, որպեսզի համայնքը ծանոթանա նորույթներին»,— նշում է ցուցահանդեսի կազմակերպչական կազմի անդամ, Մարսելի «Պարանտեզ» հրատարակչության «Դիասպորալ» հավաքածուի պատասխանատու Հուրի Վարժապետյանը։

Միության գործավար Քրիս Չոփուրյանը հավելում է, որ տարեցտարի իրենք փորձում են նոր համագործակցություններով հանդես գալ: «Մի քանի տարի համագործակցել ենք արխիվներով զբաղվող «ԱՐԱՄ» միության հետ։ Համագործակցում ենք զանազան հրատարակչությունների հետ։ Կարծում եմ՝ առաջիկա տարիներին ևս նոր գաղափարներ կունենանք։ Տարվա ընթացքում կպատրաստվենք, վստա՜հ։ Գաղափարներ միշտ կան, նորություններ միշտ կան՝ թե՛ մանուկների և թե՛ մեծերի համար։ Եվ եթե որևէ մեկը ցանկանում է համագործակցել Համազգայինի հետ, մենք միշտ պատրաստ ենք»,— ասում է նա։

Մարիամ Խաթյամաջյան

Ավելի մանրամասն՝ տեսանյութում: