Գազայի հատվածում մեկ օրում 65 պաղեստինցի է զոհվել իսրայելական ռմբակոծությունների հետևանքով

Գազայի հատվածում մեկ օրում 65 պաղեստինցի է զոհվել իսրայելական շարունակական ռմբակոծությունների հետևանքով։ Այս մասին հայտնում է Al Jazeera-ն։

Խան Յունիսի մոտակայքում իսրայելական անօդաչու թռչող սարքի՝ վրանին հարվածելու հետևանքով զոհվել են ընտանիքի հինգ անդամներ։

Իսրայելի գլխավոր շտաբի պետ Էյալ Զամիրը հայտարարել է, որ բանակը շարունակում է իր օպերատիվ ճնշումը և հնարավորինս սեղմում է օղակը ՀԱՄԱՍ-ի շուրջ։ Զամիրը հավելել է, որ եթե պատանդներին վերադարձնելու հարցում առաջընթաց չգրանցվի, ապա ռազմական գործողությունների շրջանակը կընդլայնվի։

Վերջին օրերին նմանատիպ հայտարարություններ են հնչեցրել նաև Իսրայելի վարչապետ Բենիամին Նեթանյահուն և պաշտպանության նախարար Իսրայել Կացը։

Միևնույն ժամանակ, Իսրայելի բանակը հրամայել է Գազայի հատվածի հյուսիսում գտնվող Բեյթ Հանուն և Շեյխ Զայեդ շրջանների բնակիչներին լքել բնակավայրերը։