Մեկնարկել է ԱՄՆ-ի և Ուկրաինայի պատվիրակությունների հանդիպումը

Սաուդյան Արաբիայի Ջիդդա քաղաքում սկսվել են ԱՄՆ-ի և Ուկրաինայի պատվիրակությունների բանակցությունները: Ուկրաինական պատվիրակության կազմում են նախագահի գրասենյակի ղեկավար Անդրեյ Երմակը, արտգործնախարար Անդրեյ Սիբիհան և պաշտպանության նախարար Ռուստեմ Ումերովը։ ԱՄՆ-ի կողմից բանակցություններին մասնակցում են պետքարտուղար Մարկո Ռուբիոն, Սպիտակ տան ազգային անվտանգության հարցերով խորհրդական Մայք Ուոլցը և ԱՄՆ նախագահի հատուկ պատվիրակ Սթիվ Ուիթքոֆը։ 

Ավելի վաղ Ռուբիոն հայտարարել էր, որ Սաուդյան Արաբիայում հանդիպման ժամանակ ԱՄՆ-ն հույս ունի հասկանալ Ուկրաինայի մտադրությունները և Կիևի ու Մոսկվայի դիրքորոշումների տարբերությունը։ Նա նաև ասել է, որ ԱՄՆ վարչակազմը լավատեսորեն է տրամադրված ուկրաինական կողմի հետ բանակցությունների նկատմամբ։

Պետքարտուղարը նշել է, որ այս հանդիպումից կախված կլինի՝ արդյոք Միացյալ Նահանգները կվերսկսի Կիևին ռազմական օգնության և հետախուզական տվյալների տրամադրումը, թե՞ ոչ։ Նա նաև ասել է, որ պարտադիր չէ, որ ԱՄՆ-ն և Ուկրաինան հենց մարտի 11-ին համաձայնեցնեն հազվագյուտ հողային մետաղների վերաբերյալ համաձայնագիրը: