Շիրակ Թորոսյանին հեռացրե՞լ են սեփական կուսակցությունից  

ՀՀ ԱԺ «Քաղաքացիական պայմանագիր» խմբակցության պատգամավոր Շիրակ Թորոսյանի՝ ԱԺ պաշտոնական կայքէջում զետեղված կենսագրականի մեջ նշված է, որ վերջինս 1997-2021 թթ. եղել է «Հզոր հայրենիք» կուսակցության ղեկավար մարմնի անդամ, կազմակերպական բաժնի վարիչ, 2006-2021 թթ.՝ կուսակցության փոխնախագահ: Նույն հարթակում Շիրակ Թորոսյանը պաշտոնապես ներկայացված է իբրև անկուսակցական: Ենթադրելի է՝ հենց 2021 թ. վերջինս դուրս է եկել «Հզոր հայրենիք» կուսակցությունից կամ, ամենևին չի բացառվում, Թորոսյանին հեռացրել են նշված քաղաքական կազմակերպությունից:

Մեր վերջին ենթադրությունը պատահական չէ, քանի որ «Հզոր հայրենիք» կուսակցության  ծրագրային դիրքորոշումներում պարզ գրված է. «ՀՀ արտաքին քաղաքականության օրակարգային հարցերից է Լեռնային Ղարաբաղի հիմնախնդրի արդարացի լուծումը. ԼՂ-ն չի կարող լինել Ադրբեջանի մաս» (ՀՀ կուսակցություններ, տեղեկագիր 2007, Երևան, 2007, էջ 226): Պարզորոշ է՝ Արցախի հարցում նման կարծր ծրագրային դրույթ ունեցող կուսակցության փոխնախագահը չի կարող լինել մի անձ, ով հանդիսանում է Նիկոլ Փաշինյանի՝ ԼՂ-ն Ադրբեջանի մաս հայտարարած դավաճանական խմբավորման կարկառուն անդամ-պատգամավոր:

Պատերազմից հետո Փաշինյանի իշխանության դավաճանություններին ու բացահայտ թուրքահաճո ուղեգծին հավատարիմ մնացած, Նիկոլ Փաշինյանին ԱԺ-ում հոտընկայս ծափահարած Շիրակ Թորոսյանն այժմ էլ, երբ այդ նույն իշխանությունը հայտարարել է, որ Արցախը ճանաչում է Ադրբեջանի կազմում, շարունակում է հաճույքով մնալ Փաշինյանի իշխանական նավում՝  ինքնըստինքյան ասելով, որ ինքը ևս Արցախը համարում է Ադրբեջանի մաս:

Արդյոք Շիրակ Թորոսյանին հեռացրել են «Հզոր հայրենիք» կուսակցությունից՝ կուսակցության գաղափարաբանությանն ու ծրագրային դրույթներին դեմ գնալու,  Փաշինյանի՝ Արցախի դեմ իրագործվող հանցավոր քաղաքականությանը մաս կազմելու, դրանով իսկ՝ «Հզոր հայրենիքի» անցած ուղուն, պատվին և հեղինակությանը հսկայական ռեպուտացիոն վնաս պատճառելու համար, թե՞ Թորոսյանն ինքն է հեռացել իր նախկին կուսակցությունից, վերջինիս հետ անցած քառորդարյա ուղուց՝ որոշելով ընտրել Փաշինյանի  խմբավորման ընտրած թուրանական ընթացքն ու ընդունելով, որ Արցախն  Ադրբեջանի անբաժան մասն է:

Վերոնշյալ հարցերը գրավոր ուղղել ենք Ազգային ժողովի ՔՊ խմբակցության պատգամավոր Շիրակ Թորոսյանին և սպասում ենք պարզաբանումների: