Աբդուլլահ Դեմիրբաշը Վատիկանում հանդիպել է Հռոմի Պապի հետ

Դիարբեքիրի Սուր շրջանի նախկին քաղաքապետ, Ժողովուրդների դեմոկրատական կուսակցության (HDP) անդամ Աբդուլլահ Դեմիրբաշը Վատիկանում հանդիպել է Հռոմի Պապ Ֆրանցիսկոս Առաջինի հետ։ Հանդիպումը կայացել է Աբդուլլահ Դեմիրբաշի խնդրանքով։ Այդ մասին, Akunq.net-ի փոխանցմամբ, հայտնում են քրդական լրատվամիջոցները։

Աղբյուրի համաձայն՝ Դեմիրբաշը Հռոմի Պապին խնդրել է աղոթել քրդական հարցի խաղաղ կարգավորման համար և նրան մի քրդական ստեղծագործություն նվիրել։ Բացի այդ, քուրդ քաղաքական գործիչը մի նամակ է փոխանցել Հռոմի Պապին, որում մասնավորապես անդրադարձել է քրդերի՝ պատմության ընթացքում կրած չարչարանքներին, որ նրանք ենթարկվել են քրդական ինքնությունը, լեզուն ու մշակույթը պահպանելու համար։

Դեմիրբաշը նամակում ընդգծել է, որ իր ծննդավայր Դիարբեքիրը պատմականորեն զանազան լեզուների, հավատքների և ժողովուրդների բնակավայր է եղել, և որ այստեղ ներկայում համատեղ ապրում են ասորիներ, քաղդեացիներ, քրիստոնյաներ, մահմեդականներ և հրեաներ։ Նա նաև հայտնել է, որ ինքը իր պաշտոնավարման տարիներին Դիարբեքիրում, որպես հինավուրց քաղաքակրթությունների եղբայրության առհավատչյա, իրականացրել է այնպիսի քաղաքականություն, որ եկեղեցին, մզկիթն ու սինագոգը կարողանան կողք կողքի գոյատևել։

Դեմիրբաշը հիշեցրել է «Քառասունների մեջլիս» կոչվող հաստատության մասին, որի տանիքի տակ մեկտեղվում էին ասորիները, քաղդեացիները, հայերը, մի խոսքով՝ մուսուլմաններն ու քրիստոնյաները։ Նամակի հեղինակը նաև շեշտել է, որ իր քաղաքականության առանցքում եղել է փոքրամասնությունների տարբերությունները որպես հարստություն ընկալելու գաղափարը։ Նամակի վերջում Դեմիրբաշն անդրադարձել է վերջին տարիներին քրդերի և եզդիների՝ ԻԼԻՊ-ի կողմից համակարգված կերպով հարձակումների ենթարկվելու փաստին։

Հիշեցնենք, որ երկար ժամանակ Սուրի քաղաքապետի պաշտոնում գտնված Աբդուլլահ Դեմիրբաշը հայտնի էր իր հայամետ դիրքորոշմամբ և գործունեությամբ։ Հենց նրա պաշտոնավարման տարիներին է վերանորոգվել և վերաբացվել Սուր շրջանի Գյավուր թաղում գտնվող Սուրբ Կիրակոս հայկական եկեղեցին, որն իրավամբ համարվում է Մերձավոր Արևելքի ամենամեծ հայկական եկեղեցիներից մեկը։ Դեմիրբաշը նաև հաճախ էր այցելում Հայաստանի Հանրապետություն և մասնակցում այստեղ տեղի ունեցող միջոցառումների։ Դեմիրբաշի նախաձեռնությամբ Դիարբեքիրում հայերեն գրքեր էին հրատարակվում։

Աղբյուր՝ https://www.kurdistan24.net/tr/story/88295-Abdullah-Demirbaş’tan-Papa’ya-mektup:-Kürtler-tarih-boyunca-acılara-maruz-kaldı

Մելինե Անումյան

Akunq.net