Բեխաբար, սակայն պետական բյուջեից առատորեն պարգևատրվող, Նիկոլ Փաշինյանի քավոր մարզպետը․ Ոսկան Սարգսյան

Տավուշի մարզպետարանի ինտերնետային, պաշտոնական կայքում տեղեկատվություն է զետեղված Տավուշի մարզի 4 խոշոր համայնքների եւ նրանց ղեկավարների մասին։

Այդ կայքում որպես Բերդ խոշոր համայքի ղեկավար ներկայացված է 2012թ.-ից Բերդ համայնքը ղեկավարած, 2016-ին այդ պաշտոնում վերընտրված, 2017թ.-ին Բերդ խոշոր համայնքի ղեկավար ընտրված Հարություն Մանուչարյանը։ Վերջինիս դեմ հարուցված քրեական գործի շրջանակներում նա 2021թ․ նոյեմբերի 9-ից անազատության մեջ էր, 2022թ․ հոկտեմբերի 7-ին ազատ արձակվեց, սակայն նոյեմբերի 10-ին, իր դեմ հարուցված այլ քրեական գործի շրջանակներում, նորից կալանավորվեց։

Հ․ Մանուչարյանի գլխավորած «Զորավոր համայնք» դաշինքը հաղթել է 2022թ․ սեպտեմբերի 25-ին կայացած Բերդ համայնքի ավագանու համամասնական կարգով ընտրություններում, սակայն դրանից հետո այդ դաշինքի ավագանու թեկնածուների ցանկի առաջին համար Հ․ Մանուչարյանը եւ 2-րդ համար Սամվել Հովսեփյանը ավագանու անդամությունից հրաժարական են տվել։

Նոյեմբերի 10-ին համայնքի նորընտիր ավագանին Բերդ համայնքի ղեկավար է ընտրել «Զորավոր համայնք» դաշինքի ավագանիների թեկնածուների ցանկի 3-րդ համար Աստղիկ Հակոբյանին, նոյեմբերի 13-ին կայացել է նրա երդման եւ պաշտոնի ստանձնման հանդիսավոր արարողությունը Ա․ Հակոբյանի համայնքի ղեկավար ընտրվելուց 20 օր է անցել, սակայն Տավուշի մարզպետարանի կայքում որպես Բերդ համայնքի ղեկավար նշված է Հ․ Մանուչարյանը։

Այդ կայքում Բերդ համայնքի ավագանու 21 անդամներից նշված են միայն 13-ի անուն-ազգանունները։ Նորընտիր ավագանու անդամներից Սարգիս Մարգարյանը Հ․ Մանուչարյանի եւ Ս․ Հովսեփյանի հետ ավագանու թեկնածությունից հրաժարական է տվել, սակայն նրա անունը, որպես ավագանու անդամի, նշված է մարզպետարանի ինտերնետային կայքում, վերոհիշյալ 13-ի թվում։ Վարչապետ Նիկոլ Փաշինյանի դասընկեր, հարսանիքի քավոր, Նիկոլ Փաշինյանի կողմից 2021թ, ապրիլի 8-ին Տավուշի մարզպետ նշանակված Հայկ Ղալումյանը եւ Տավուշի մարզպետարանը այսպես անփույթ են աշխատում, սակայն այդ վատ աշխատանքի համար 2022թվականին Տավուշի մարզպետարանի պաշտոնյաները պարգեւատրվելու են 88 միլիոն 92 հազար 700 դրամի չափով։

Ոսկան Սարգսյան

Լրագրող