Սի Ցզինպինը հակառուսական պատժամիջոցները բեռ է համարում համաշխարհային տնտեսության համար

Ուկրաինայում ստեղծված իրավիճակի պատճառով պատժամիջոցները կազդեն համաշխարհային ֆինանսների, էներգետիկայի, մատակարարման շղթաների կայունության վրա և նոր բեռ կդառնան համաշխարհային տնտեսության համար, որն արդեն իսկ տուժել է համաճարակից. ասել է Չինաստանի նախագահ Սի Ցզինպինը։

Երեքշաբթի Սի Ցզինպինը տեսագագաթնաժողով է անցկացրել Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի հետ. երեք երկրների ղեկավարները քննարկել են իրավիճակը Ուկրաինայում, Իրանի միջուկային համաձայնագիրը և Չինաստանի համագործակցությունը ԵՄ-ի հետ։

«Մենք պետք է համատեղ ջանքեր գործադրենք՝ նվազեցնելու համար ճգնաժամի բացասական ազդեցությունը»,- ասել է Սի Ցզինպինը, որին մեջբերում է Չինաստանի կենտրոնական հեռուստատեսությունը։

Նրա խոսքով՝ «համապատասխան պատժամիջոցները կազդեն համաշխարհային ֆինանսների, էներգետիկ ռեսուրսների, տրանսպորտի և մատակարարման շղթաների կայունության վրա, կծանրաբեռնեն համաշխարհային տնտեսությունը, որը գտնվում է համաճարակի ծանր բեռի տակ, ինչը ձեռնտու չէ ոչ մի կողմին»։