Զելենսկին հրամանագիր է ստորագրել երեք տարում Ուկրաինայի բանակը 100 հազարով ավելացնելու մասին

Ուկրաինայի նախագահ Վլադիմիր Զելենսկին, ելույթ ունենալով Գերագույն ռադայում կայացած յոթերորդ նստաշրջանի ժամանակ, հրամանագիր է ստորագրել պետության պաշտպանունակության և զինվորական ծառայության գրավչության ուժեղացման մասին, որը նախատեսում է բանակի թվաքանակի մեծացում։

«Այս հրամանագիրը նախատեսում է բոլոր զինվորականների դրամական նպաստի բարձրացում՝ մինչև երեք նվազագույն աշխատավարձի չափով, Ուկրաինայի անցում պրոֆեսիոնալ բանակի հիմքերին, պայմանագրերի ժամկետի ավելացում, զինվորական անձնակազմի, վետերանների և նրանց ընտանիքների համար բնակարանային ապահովում, սպաների կարիերայի զարգացման համակարգ, ինչպես նաև առաջիկա երեք տարիների ընթացքում Ուկրաինայի զինված ուժերի թվի 100000-ով ավելացում և լրացուցիչ 20 բրիգադների ստեղծում»,- ասել է Զելենսկին։

Նա հավելել է, որ այդ հրամանագրով կնշանավորվի Ուկրաինայի անցումը պրոֆեսիոնալ բանակի։

«Այս հրամանագիրը նրանից չէ, որ շուտով պատերազմ է լինելու: Այս հրամանագիրը նրա համար է, որ շուտով խաղաղություն լինի: Ես ուրախ եմ ստորագրել այս հրամանագիրը»,- ասել է Ուկրաինայի նախագահը: