Ո՞վ իմանա՝ ադրբեջանցիներն ո՞ւմ են նախընտրելու ձերբակալել․ Գորիսի փոխքաղաքապետ

Այս պահին ես չեմ ճանաչում մեկին, որը հոգեբանորեն պատրաստ կլինի անցնել Գորիս-Կապան միջպետական ճանապարհի այն հատվածով, որտեղ ադրբեջանցի ոստիկանները զինված ստուգումներ են անում։ Անցնի, թշնամուն տա իր անձնագիրը ու այդքանից հետո էլ վճարումներ անի թշնամուն՝ իր երկրով անցնելու համար:  Եթե անվտանգության երաշխիք տվողներ չկան, ո՞վ իմանա՝ ադրբեջանցիներն ո՞ւմ  կնախընտրեն ձերբակալել․ Yerkir.am-ի հետ զրույցում ասում է Գորիսի փոխքաղաքապետ Իրինա Յոլյանը։

Ըստ նրա՝  Գորիսում շաբաթներ առաջ ծագած խնդիրները լուծում չեն ստացել, Գորիս-Կապան միջպետական ճանապարհը դեռեւս փակ է, այլընտրանքային ճանապարհները՝ դժվարանցանելի։

«Տաթեւով անցնող այլընտրանքային ճանապարհների դժվարանցանելիության խնդիրը դեռեւս շարունակում է մնալ մտահոգիչ: Եթե ձյուն տեղա, եղանակային պայմանները վատանան՝ բավականին  լուրջ խնդիրներ են առաջանալու Գորիսի այդ հատվածի գյուղերի համար: Այդ ճանապարհը տեխնիկական առումով  չի կարող փոխարինել թշնամուն հանձնված միջպետական ճանապարհին: Վարորդները բազմիցս ահազանգել են՝թեթեւ ձյան պարագայում սարսափելի վիճակ է լինում»,- ասում է Գորիսի փոխքաղաքապետը:

Այսօր Ադրբեջանի ծրագրած եւ այս իշխանությունների թուլության, ո՞վ գիտի՝ գուցե թշնամու հետ պայմանավորվածության արդյունքում ոչ միայն կորցրել ենք Գորիս-Կապան միջպետական ճանապարհը, այլեւ կասկածի տակ է դրվել Կապան համայնքի մեջ ներառված Շիկահող, Սրաշեն, Ճակատեն, Շիշկերտ, Ներքին Հանդ, Ծավ գյուղերի անվտանգությունը։ Այս գյուղերը փաստացի կտրվել են շրջկենտրոն Կապանից եւ այժմ Կապան հասնելու համար կա՛մ պետք է օգտվեն այլընտանքային եւ անանցանելի ճանապարհներից, կա՛մ Մեղրի-Քաջարան-Կապան ճանապարհից, որի երկարությունը շուրջ 150 կիլոմետր է։ Այս պահին Սյունիքում հարաբերականորեն հանգիստ է, բայց՝ վախեցնող։ Մտահոգություններ կան Փաշինյանի կողմից թշնամու հետ նոր փաստաթուղթ ստորագրելու առնչությամբ, որով վտանգի տակ է դրվելու ամբողջ Սյունիքը:

Անդրադառնալով այս հարցերին՝ Յոլյանը շեշտում է, որ Գորիսի բնակչությունն այդ կապակցությամբ լուրջ մտահոգություններ ունի, մարդիկ ուզում են հասկանալ, թե ինչ է լինելու, ի վերջո, Փաշինյանի բոլոր որոշումների անմիջական կրողը հենց սյունեցիներն են:

Երեւանում մեկնարկած ազատագրական շարժման նման Գորիսում էլ մտավորականությունը ոտքի է ելել։ Ստեղծել են անվտանգության հարցերով հանձնաժողով, փորձում են լուծումներ եւ տարբերակներ գտնել, հարկ եղած դեպքում՝ ժողովրդին մոբիլիզացնել: Հիշենք, թե ինչպես 44-օրյա պատերազմի ընթացքում Գորիսը շատ արագ կարողացավ ինքնակազմակերպվել ե՛ւ թիկունքային աշխատանքների, ե՛ւ առաջնագծի հարցերում:

«Ստեղծված իրավիճակով պայմանավորված՝ համայնքը մի մարդու նման ոտքի է կանգնելու: Կազմակերպչական աշխատանքներ են տարվում, տեղացի մտավորականները քննարկումներ են կազմակերպում՝ ինչպես անել, որպեսզի արդյունավետ լուծումներ գտնեն: Եթե երկրի անվտանգության եւ բոլորիս փրկության հարցն է, պիտի միասնական լինենք, մեր երկրի յուրաքանչյուր քառակուսի մետրի համար պիտի պայքար տանք»,- նշում է Գորիսի փոխքաղաքապետը:

                                                                                                                    Լիանա Սարգսյան