Սի Ցզինպինը հրաժարվել է հանդիպել Բայդենի հետ. ԱՄՆ նախագահը հերքում է

ԱՄՆ նախագահ Ջո Բայդենը հերքել է Չինաստանի առաջնորդ Սի Ցզինպինի՝ իր հետ հանդիպումից հրաժարվելու մասին տեղեկությունները։

«Ճիշտ չէ», - ասել է նա՝ պատասխանելով Սպիտակ տանը կայացած ճեպազրույցում  հնչած հարցերին, թե ՉԺՀ նախագահն իրո՞ք մերժել է իր հետ հանդիպման առաջարկը, և արդյո՞ք ԱՄՆ նախագահը հիասթափված է դրանից:

Չինական կողմի՝ հանդիպումից հրաժարվելու մասին հայտնել է Financial Times-ը՝ հղում անելով իր աղբյուրներին: Մասնավորապես նշվում է, որ Բայդենը վերջին հեռախոսազրույցի ընթացքում Սի Ցզինպինին առաջարկել է գագաթնաժողով անցկացնել, որից չինացի առաջնորդը հրաժարվել է՝ առաջարկելով Վաշինգտոնին՝ մեղմացնել իր հռետորաբանությունը Պեկինի նկատմամբ:

Ավելի վաղ հաղորդվել էր, որ սեպտեմբերի 10-ին ՉԺՀ ու ԱՄՆ նախագահները հեռախոսազրույց են ունեցել: Սպիտակ տունը հայտնել է, որ առաջնորդները քննարկել են երկու երկրների միջև մրցակցության խնդիրները և հակամարտության վերաճումից խուսափելու ուղիները: