Ռուսաստանը կպաշտպանի Հայաստանի սահմանները իր սահմանների պես. ռուսաստանցի սենատոր

Ռուսաստանը կպաշտպանի Հայաստանի ճանաչված սահմանները որպես իր սահմանները, քանի որ երկու երկրներն էլ Հավաքական անվտանգության պայմանագրի կազմակերպության (ՀԱՊԿ) անդամ են: Այս մասին հայտարարել է ռուսաստանցի սենատոր, Դաշնության խորհրդի միջազգային հարաբերությունների հանձնաժողովի անդամ Անդրեյ Կլիմովը:

Պատասխանելով հարցին, թե ինչպես է Մոսկվան դիտարկում Ադրբեջանի և ՆԱՏՕ-ի անդամ Թուրքիայի սերտ մերձեցումը, սենատորը նշել է, որ Ռուսաստանն ի վիճակի է պաշտպանել իրեն և դաշնակիցներին «մնացած բոլորից» և խորհուրդ է տվել Թուրքիային՝ գործնականում դա չստուգել:

Կլիմովը վստահություն է հայտնել, որ Ռուսաստանի կարողությունները «փորձելը» ոչ մեկի համար լավ չի ավարտվի, և Անկարան դա լավ է հասկանում: Ռուսաստանն իր հերթին նույնպես չէր ցանկանա խնդիրները բազմապատկել: