Մահացել է Իրանի գերագույն առաջնորդի ռազմական խորհրդականը

Իրանում մահացել է երկրի գերագույն առաջնորդի` այաթոլլա Ալի Խամենեիի բարձրագույն ռազմական խորհրդականը, Իրանի զինված ուժերի գլխավոր շտաբի նախկին պետ, գեներալ-մայոր Հասան Ֆիրուզաբադին: Այս մասին հայտնում է IRNA տեղական պետական գործակալությունը՝ հղում անելով Իրանի նախագահ Իբրահիմ Ռաիսիի գրասենյակի հայտարարությանը:

Ռաիսին ցավակցություն է հայտնել Ֆիրուզաբադիի մահվան կապակցությամբ Իրանի զինված ուժերի գլխավոր հրամանատարին, իրանական ժողովրդին, զինվորականներին, ինչպես նաև մահացածի բոլոր ընկերներին և ծանոթներին, հատկապես՝ նրա ընտանիքին։ Իրանի նախագահը նշել է, որ Ֆիրուզաբադիի մահը խոր վիշտ է պատճառել:

Այաթոլլահ Խամենեիի ռազմական խորհրդականը 70 տարեկան էր: Միջադեպի վերաբերյալ այլ մանրամասներ Իրանի նախագահի հայտարարության մեջ չեն նշվում:

Ըստ Euronews- ի և Deutsche Welle-ի իրանական գրասենյակների՝ Ֆիրուզաբադին մահացել է սրտի իշեմիկ հիվանդությունից: Իրանական Tansim գործակալությունը գրում է, որ, «ըստ մամուլի հրապարակումների», գեներալ-մայորի մահվան պատճառը կորոնավիրուսն է: COVID-19-ը, որպես Իրանի զինված ուժերի գլխավոր շտաբի նախկին ղեկավարի մահվան պատճառ, համարում է նաև ISNA գործակալությունը։

Հասան Ֆիրուզաբադին տարբեր տարիներին զբաղեցրել է Իրանի փոխվարչապետի պաշտոնը և աշխատել «երկիր-երկիր» հրթիռների ստեղծման կոմիտեում: 1989 թվականին նշանակվել է երկրի զինված ուժերի գլխավոր շտաբի պետ: Նա այդ պաշտոնը զբաղեցրել է 27 տարի, իսկ ավելի ուշ՝ 2016 -ին, նշանակվել Այաթոլլահ Ալի Խամենեիի ռազմական խորհրդական: