Ֆեյսբուքն արգելափակել է Ռուբեն Մելքոնյանի՝ ՔՊ–ական պատգամավորի մասին արված գրառումը

ԵՊՀ Արեւելագիտության ֆակուլտետի դեկան Ռուբեն Մելքոնյանի նախօրեին արված գրառումը ֆեյսբուքն արգելափակել է։ Այս մասին ֆեյսբուքյան իր էջում գրել է Մելքոնյանը։

Նա, մասնավորապես, գրել է.

«Հարգելի ընկերներ, երեկվա գրառումս ֆեյսբուքը արգելափակել է ինձ անհասկանալի պատճառներով: Ավելի ճիշտ, ենթադրում եմ, որ «ազատ խոսքի», «բազմակարծության» կեղծ կողմնակիցների կողմից բողոքարկվել է, սակայն կրկին արեւելյան իմաստություն մեջբերելով ասեմ, որ արեւը ցեխով հնարավոր չէ փակել, ճշմարտությունը կեղծիքով հնարավոր չէ լռեցնել.... Իմ երեկվա գրածը կարող եք գտնել բազմաթիվ լրատվական կայքերում, իսկ իմ կողմից ավելացնեմ ինչպես հայտնի երգիծական տեսանյութում է ասվում. «երեկվա ասածս ուժի մեջ ա»....»։

Հիշեցնենք՝ ավելի վաղ Ռուբեն Մելքոնյանը, անդրադառնալով ԱԺ ՔՊ-ական պատգամավորի՝ իր և իր ղեկավարած հաստատության հասցեին ուղղված մեղադրանքներին, տարածել էր հետևյալ հայտարարությունը. 

«Այսօր տեղեկացա, որ Ազգային ժողովում ճակատագրի հեգնանքով հայտնված մեկը, ում անվանումը և դեմքը ասոցացվում է փոքրամասշտաբ բեռներ տեղափոխելու համար նախատեսված իրի՝ ուսապարկի հետ, կրկին սուտ է խոսել ԵՊՀ արևելագիտության ֆակուլտետում իբրև առկա բարքերի և դեկանի, այսինքն՝ իմ մասին:

Ի ամոթ մեզ՝ արևելագետներիս, համանուն ֆակուլտետը Կոկա-Կոլայի պես կրկին փորձելով մի կերպ ավարտածը պնդում է, թե իբրև դեկանը ընդդիմադիր ուսանողներին ժամանակին ուղղորդել է և պահանջել է չքննադատել Հայաստանի այն ժամանակվա նախագահ Սերժ Սարգսյանին, քանի որ դա կարող է ազդել իրենց առաջադիմության վրա:

Նախ՝ կոնկրետ այդ պերսոնաժի պարագայում առաջադիմության և պատվի վրա այլևս ոչինչ չի կարող ազդել...

Արևելքում դաժան պատժի ձև կար, որը կիրառվում էր հատկապես կրթական որոշակի ցենզ ունեցողի հանդեպ՝ նրան նույն սենյակում էին փակում հիմարի հետ, ով խոսում էր այն, ինչից նա հմուտ է՝ հիմարություն: Ուստի, չուզենալով կամովին ինձ դատապարտել այդ պատժին` Ավետիք Իսահակյանի պես մտածում էի, թե ինչ լավություն եմ արել այդ «արևելագետին», որ հարուցել եմ նման երախտամոռություն և հիշեցի, որ թույլ եմ տվել սահմանված ժամկետների խախտումով (ուշ էր ներկայացրել աշխատանքը ղեկավարին) մասնակցել դիպլոմային աշխատանքի պաշտպանության և մի կերպ ավարտել ԵՊՀ-ն: