ԱՄՆ-ը Թուրքիային առաջարկել է ռուսական Ս-400-ի այլընտրանք. Պետդեպարտամենտ

ԱՄՆ-ը Թուրքիային այլընտրանքային առաջարկ է ներկայացրել` ռուսական Ս-400 հակաօդային պաշտպանության համակարգի գնելուն հակազդելու համար. մայիսի 28-ին CNN Turk-ին տված հարցազրույցում ասել է ԱՄՆ պետքարտուղարի տեղակալ Ուենդի Շերմանը:

Ըստ նրա՝ այժմ Վաշինգտոնը սպասում է Անկարայի որոշմանը:

«Ս-400-ի գնումը խնդիր է առաջացնում ՆԱՏՕ-ում: Մենք այլընտրանքային առաջարկ ենք ներկայացրել, նրանք հստակ գիտեն՝ ինչ անել: Հուսով եմ, որ կարող ենք ընդհանուր լեզու գտնել»,- ասել է Շերմանը:

Նշենք, որ Թուրքիան ռուսական ՀՕՊ համակարգերը ձեռք էր բերել 2019 թ. ամռանը՝ դրանով խարխլելով թուրք-ամերիկյան հարաբերությունները։ Ըստ ԱՄՆ-ի՝ այդ զինատեսակը վտանգ է ներկայացնում ՆԱՏՕ-ի տեխնիկաների համար։