Պուտինը ձայնագրել է իր ելույթը ՄԱԿ-ի Գլխավոր ասամբլեայի համար

Ռուսաստանի նախագահ Վլադիմիր Պուտինը տեսաելույթ է ձայնագրել ՄԱԿ-ի Գլխավոր վեհաժողովի համար. հայտնում է ՌԻԱ «Նովոստի»-ն ` նշելով, որ ելույթը ձայնագրվել է «Ընդհանուր ապագան՝ համընդհանուր ջանքերով» գրությամբ պաստառի ֆոնին:

Ելույթը կցուցադրվի սեպտեմբերի 22-ին՝ Գլխավոր վեհաժողովի առաջին օրը:

Հիշեցնենք՝ ՄԱԿ-ում բարձր մակարդակով շաբաթն այս տարի կանցնի առցանց ձևաչափով: Ըստ նախնական ենթադրությունների՝ ՄԱԿ-ի դահլիճում ներկա կլինեն մեկական ներկայացուցիչներ յուրաքանչյուր երկրից: Երկրների ղեկավարներին և նախարարներին Գլխավոր վեհաժողովն առաջարկել է ձայնագրել իրենց ելույթները, որոնք կցուցադրվեն քննարկումների ընթացքում: Կա նաև մեկ այլ տարբերակ` նրանց ելույթները կարող են ընթերցել ՄԱԿ-ում մշտական ներկայացուցիչները: Ներածական խոսքի համար յուրաքանչյուր առաջնորդի 15 րոպե է տրամադրվում:

Ըստ ՄԱԿ-ի գլխավոր քարտուղարի պաշտոնական ներկայացուցիչ Սթեֆան Դյուժարիկի՝ կազմակերպությունը 26 տեսաուղերձ է ստացել:

Երկրների ղեկավարներին նաև չեն արգելել անձամբ ներկայանալ և ելույթ ունենալ ՄԱԿ-ի կենտրոնակայանում: