Թուրքիան մտադիր է բացել զբոսաշրջային սեզոնը

«Մենք ուրախությամբ փաստում ենք, որ համաճարակն անկում է ապրում», - այս մասին ապրիլի 26-ին նշել էր Թուրքիայի առողջապահության նախարար Ֆահրեթթին Քոջան: Մայիսի 5-ի տվյալներով Թուրքիան վարակվածության դեպքերի քանակով աշխարհում 7-րդ հորիզոնականից տեղափոխվել է 8-րդ տեղը՝ իր տեղը զիջելով Ռուսաստանին։

Օրեր առաջ Թուրքիայի նախագահ Ռեջեփ Թայիփ Էրդողանը նշել էր այն ժամկետները, երբ մարտի 16-ից ուժի մեջ մտած կարանտինային միջոցառումները կարող են հանվել։ «Հույս ունենք Ռամադանի վերջին կրկնակի տոն նշել։ Օրեցօր նվազում է վարակվածների թիվը։  Բուժվածների թիվը հասել է շրջադարձայինկետի», - ասել էր Էրդողանը։

Այս տարի Թուրքիան հույս ունի զբոսաշրջային տարի ունենալ: Առաջինը կբացվեն հյուրանոցներն ու զբոսաշրջային տարածքները, որոնք կստանան կորոնավիրուսի բացակայության վկայագիր: Սա կնշանակի, որ դրանց հյուրերի և անձնակազմի միջև դեպքեր չեն եղել, և տարածքում կան անվտանգության միջոցառումներ: Լողափներում կլինեն ավելի քիչ պառկելաթոռներ, ռեստորաններում սեղանները միմյանցից հեռու կդրվեն և հյուրերի միայն կեսը կտեղավորվեն համարներում: Պայմաններից մեկն կլինի այն, որ զբոսաշրջիկների շրջանում այդքան սիրված շվեդական սեղանը կվերացվի: Ամենայն հավանականությամբ դրա փոխարեն կլինի համապարփակ ընտրացանկ:

Մայիսի կեսերից երկրում կաճի ներքին զբոսաշրջությունը. այս մասին հույս է հայտնել Թուրքիայի մշակույթի և զբոսաշրջության նախարարությունը:

Մինչդեռ Tourism Economics  վերլուծական գործակալությունը  կանխատեսում է միջազգային զբոսաշրջության վերականգնումը միայն հուլիս ամսին: Այս տարի միջազգային ուղևորափոխադրումների թիվը կնվազի առնվազն 10,5%-ով, իսկ առավել հոռետեսական սցենարի դեպքում՝ 17.9% -ով:

Թուրքիայի համար շատ կարևոր է պահպանել զբոսաշրջային բիզնեսը, որից ստացված եկամուտները մոտ են ՀՆԱ-ի 4% -ին (2018-ին ՝ 3,8%): Զբոսաշրջության նախարարության տվյալներով ՝ զբոսաշրջության ոլորտը 2018 թվականին բերել է 29,5 միլիարդ դոլար, իսկ 2019 թ.  արդեն 34,5 միլիարդ դոլար: