Այս պահին բանակցային սեղանին որևէ փաստաթուղթ չկա. Ռուբեն Ռուբինյան

Արտգործնախարար Մնացականյանի այսօրվա անդրադարձը ղարաբաղյան հակամարտության կարգավորման գործընթացի վերաբերյալ համապարփակ էր ու առավել քան հստակ։ Այս մասին ֆեյսբուքյան իր էջում գրառում է կատարել ԱԺ «Իմ քայլը» խմբակցության պատգամավոր Ռուբեն Ռուբինյանը:

«Այս պահին բանակցային սեղանին որևէ փաստաթուղթ չկա։

Մեր սկզբունքային դիրքորոշումները վերջին երկու տարիներին բազմիցս բաց և անկեղծ արտահայտվել են ինչպես ներքին, այնպես էլ արտաքին լսարանների առաջ:

Հակամարտության խաղաղ կարգավորման համատեքստում մեզ համար սկզբունքային առաջնայնություն են Արցախի անվտանգությունն ու կարգավիճակը։

Արցախի ճակատագիրը չի կարող որոշվել առանց Արցախի մասնակցության։

Հակամարտությունը կարող է ունենալ բացառապես խաղաղ լուծում։

Հայկական կողմերը երբևէ չեն գնալու միակողմանի զիջումների։

Այն, ինչ ադրբեջանական կողմը դիտարկում է որպես տարածք, մենք դիտարկում ենք որպես անվտանգություն։

Արցախի անվտանգությունը զիջման ենթակա չէ»,- գրել է նա։

Նշենք, որ ր ավելի վաղ հայտնի է դարձել, որ ներկայում Ղարաբաղյան հակամարտության կարգավորման շուրջ բանակցությունների սեղանին գտնվում է փաստաթուղթ, որն Անդրկովկասում ձգձգված հակամարտության փուլային կարգավորում է ենթադրում: Այս մասին ապրիլի 21-ին Գորչակովի անվան հանրային դիվանագիտության աջակցության հիմնադրամի կազմակերպած առցանց կլոր սեղանի ընթացքում հայտարարել է ՌԴ արտգործնախարար Սերգեյ Լավրովը: