Դեն Քոութսը հեռանում է ԱՄՆ ազգային հետախուզության տնօրենի պաշտոնից

Դեն Քոութսը հեռանում է ԱՄՆ ազգային հետախուզության տնօրենի պաշտոնից: Այս մասին Twitter-ի իր միկրոբլոգում տեղեկացրել է ԱՄՆ նախագահ Դոնալդ Թրամփը. հաղորդում է BBC-ն:

Քոութսը պաշտոնը կլքի օգոստոսի 15-ին, որից հետո Թրամփը Ազգային հետախուզության տնօրենի պաշտոնում կառաջադրի Ջոն Ռետքլիֆի թեկնածությունը: «Ուրախ եմ տեղեկացնել, որ մեծագույն Ջոն Ռետքլիֆն իմ կողմից կառաջադրվի Ազգային հետախուզության տնօրենի պաշտոնում»,- գրել է նա:

Քոութսը հերթական բարձրաստիճան պաշտոնյան է, որը նախագահի հետ ունեցած տարաձայնությունների պատճառով լքում է ԱՄՆ կառավարության կազմը:

Հայտնի է, որ արտաքին քաղաքականության հետ կապված բազմաթիվ հարցերում, մասնավորապես՝ Ռուսաստանի, Հյուսիսային Կորեայի եւ Իրանի վերաբերյալ, Քոութսը լուրջ տարաձայնություններ ուներ Թրամփի հետ, որը բազմիցս քննադատել էր նրա ներկայացրած վերլուծությունները: Մասնավորապես` Քոութսի՝ Իրանի կողմից հնարավոր սպառնալիքների վերաբերյալ գնահատականը Թրամփը «կրավորական» էր որակել: