Թուրքիան նաև տնտեսապես թանկ կվճարի. Reuters

Բրիտանական Reuters լրատվական գործակալությանը հարցազրույց տված ամերիկացի մի բարձրաստիճան պաշտոնյա հայտնել է, որ Թուրքիայի կողմից Ս-400-ների գնման դեպքում Թուրքիան նաև բացասական տնտեսական հետևանքներ կունենա. հաղորդում է cumhuriyet.com.tr կայքը:

Բրյուսելում ՆԱՏՕ-ի անդամ երկրների ՊՆ ղեկավարների ժողովից հետո հանդիպում է տեղի ունեցել Թուրքիայի ՊՆ ղեկավար Հուլուսի Աքարի և Պենտագոնի ղեկավարի պաշտոնակատար Մարկ Էսփերի միջև: Հաղորդվում է, որ Էսփերը նախազգուշացրել է Թուրքիային, որ Ս-400-ների գնման դեպքում Թուրքիան տնտեսական վնասներ կկրի:

Reuters-ի հետ զրուցող անանուն մի ամերիկացի բարձրաստիճան պաշտոնյա էլ նշել է, որ «Պենտագոնը ևս մեկ անգամ հաստատել է, որ անհնար է միաժամանակ ձեռք բերել և' Ֆ-35, և' Ս-400: Եթե Ս-400-ներն ընդունեն, միայն Ֆ-35-ների ծրագրից չէ, որ դուրս կմղվեն, նաև տնտեսական հետևանքներ կունենան»: