Բրյուսելում Ալիև-Փաշինյան ծրագրված հանդիպում չկա. ՀՀ ԱԳ նախարար

Ընտրությունների արդյունքում ժողովրդի քվեներով ստացած մանդատը հնարավորություն է տալիս կառավարությանը բանակցելու ԼՂ խնդրի կարգավորման շուրջ և փնտրելու խաղաղ կարգավորման ձևաչափը.  «Հաղթանակ» զբոսայգում լրագրողների հետ զրույցում ասաց ՀՀ ԱԳ նախարար Զոհրաբ Մնացականյանը: 

«Կառավարությունն ընտրությունների միջոցով արտահայտում է ժողովրդի կամքը: Եվ այդ կամքի՝ ընտրությունների արդյունքում տրված մանդատի հիման վրա է կառավարությունն իր վրա վերցրել պատասխանատվությունը: Դուք պատկերացնում եք, որ երբ վարչապետն ասում է՝ ժողովուրդն է պատասխանատու, ժողովո՞ւրդը պիտի գնա, բանակցի»,- նշեց նա:

Հարցին՝ ինչպե՞ս եք պարզելու ժողովրդի տեսակետը, Մնացականյանն արձագանքեց. «Մենք չունենք ձևեր՝ հասկանալու ինչպես է աշխատում մեր հասարակական կարծիքը, առավել ևս` հասարակության, որն ինստիտուցիոնալ առումով շատ զարգացած է, քան երբեմն մեզ թվում է»: 

Ըստ նրա՝ հաճախ ենթադրվում է, թե մի գործընթաց է գնում, որը կարող է ժողովրդից կտրված լինել, նման բան չի կարող լինել:

Հարցին՝ առաջիկայում վարչապետը Բրյուսելում է լինելու, հնարավո՞ր է Հայաստանի վարչապետի և Ադրբեջանի նախագահի մակարդակով հանդիպում ԼՂ հարցով, ՀՀ ԱԳ նախարարն ասաց, որ որևէ ծրագրված բան չկա: 

Ճշտող հարցին` իսկ ոչ պաշտոնակա՞ն,  եղավ հետևյալ արձագանքը. «Գիտեք` ինչպես, երբ նույն տեղում են գտնվում, կտեսնեն: Բայց ծրագրված չէ»: