Մարդն ունի առցանց հարթակում անանուն մնալու միջազգային իրավունք. Արման Թաթոյան

Անանուն մնալը մարդու իրավունքներից մեկն է, և կան նույնիսկ մշակված միջազգային չափանիշներ ու ուղեցույցներ առցանց անանուն մնալու մշակույթի մասին. լրագրողների հետ զրույցում ասաց ՀՀ մարդու իրավունքների պաշտպան Արման Թաթոյանը:

Նա հայտնեց, որ տեղյակ է բոլոր հանրային քննարկումներից ու գիտի մտահոգությունները: «Այս հարցն անմիջականորեն գտնվում է մեր ուշադրության ներքո: Ատելության խոսքը, բռնության կոչերը, վիրավորանքը, սպառնալիքը հիմնականում տարածում են ֆեյք օգտատերերը: Երբ մեզ դիմում են, մենք դրանք ուղարկում ենք ոստիկանություն կամ դատախազություն` քրեական հետապնդում նախաձեռնելու առաջարկով: Բայց դա էլ արդյունավետ չի աշխատում, քանի որ «Ֆեյսբուք» սոցիալական ցանցում հայտնաբերելու մեխանիզմներն էլ արդյունք չեն տալիս»,- նշեց նա:

Ինչ վերաբերում է այս խնդրի հետ կապված` վարչապետի հանձնարարականին, ՄԻՊ-ը նշեց, որ ԱԱԾ-ի պես փակ կառույցը նման հարցում լայնորեն ներգրավելը կարող է նաև խնդիրներ հարուցել խոսքի ազատության ոլորտում:

«Յուրաքանչյուր մարմին պետք է զբաղվի ըստ իրավասության: Նշեցի, որ մենք աշխատում ենք ոստիկանության հետ, դատախազության հետ»,- նշեց նա` միևնույն ժամանակ նշելով, որ խոսքի ազատությունը պետք է ամուր պաշտպանված լինի, և մարդն ունի առցանց հարթակում անանուն մնալու միջազգային իրավունք: