Կարծում եմ՝ մենք հիմա օլիգարխ չունենք. ՊԵԿ նախագահ

Պետական եկամուտների կոմիտեի նախագահ Դավիթ Անանյանից այսօր լրագրողները հետաքրքրվեցին, թե  նախկին իշխանության օրոք գործունեություն ծավալած օլիգարխներից քանիսն են վճարել իրենց գործունեությունը շարունակելու համար, ինչին ՊԵԿ ղեկավարն արձագանքեց. «Նախ` պետք է բնորոշում տանք` օլիգարխն  ով է: Կարծում եմ՝ մենք հիմա օլիգարխ չունենք: Կարող է տարօրինակ հնչել, բայց օլիգարխն այն անձն է, որը իշխանական լծակները, կապիտալն օգտագործելով, զարտուղի բաներ է անում: Նախկին օլիգարխների ցուցակը տվեք, ես ասեմ՝ ով ինչ վարքագիծ է դրսևորել»։

Հակադարձմանը, որ մամուլում այս առումով  խոսվում էր Արտակ Սարգսյանի և Սամվել Ալեքսանյանի մասին, ՊԵԿ նախագահն արձագանքեց. «Արտակ Սարգսյանը նախկին օլիգա՞րխ է` ձեր կարծիքով, լավ: Նրանց գործունեությունն ինչպես նախկինում, համենայն դեպս` ոչ շատ վաղ անցյալում, այնպես էլ հիմա նույն շրջանառությունն է ապահովել։ Պետք է ասեմ, որ SAS սուպերմարկետների ցանցը, օրինակ, ՀԴՄ տրամադրելու առումով առաջամարտիկներից մեկն է: Իսկ եթե ձեզ հետաքրքրում են Սամվել Ալեքսանյանի բիզնեսները, ապա, հավաքական առումով, նրանք ավելի շատ հարկ են վճարել, քան նախորդ ժամանակաշրջաններում: Ուղղակի ճիշտ բիզնեսների համախումբ պետք է վերցնեք, քանի որ բիզնեսները տրոհվել են՝ գործելու համար ավելի թափանցիկ»։