Իրանն ու Ադրբեջանը մտադիր են ընդլայնել համագործակցությունը ռազմական ոլորտում

Իրանն ու Ադրբեջանը մտադիր են ընդլայնել ռազմական ոլորտում համագործակցությունը: Այս մասին այսօր՝ հունվարի 16-ին, Բաքվի միջազգային օդանավակայանում հայտարարել է Իրանի ԶՈՒ գլխավոր շտաբի պետ, գեներալ-լեյտենանտ Մոհամմադ Բաղերին. տեղեկացնում է ԻՌՆԱ-ն:

«Ադրբեջանն Իրանի կարեւորագույն հարեւաններից է, որի հետ հարաբերություններն առանցքային նշանակություն ունեն մեզ համար»,- ասել է գեներալը՝ հավելելով, որ այցը նպատակ ունի ամրապնդել եւ ընդլայնել պաշտպանական ու անվտանգության ոլորտներում երկկողմ համագործակցությունը:

Ըստ նրա՝ հաշվի առնելով երկու երկրների պատմական հարաբերությունները եւ ամենատարբեր ոլորտներում սերտ համագործակցությունը, նման մակարդակի այցելության անհրաժեշտություն էր զգացվում:

Նշենք, որ Բաղերիի այցը տեղի է ունենում Ադրբեջանի պաշտպանության նախարարի հրավերով: Երկօրյա պաշտոնական այցի ընթացքում Իրանի ԶՈՒ ԳՇ պետը բանակցություններ կունենա Ադրբեջանի զինվորական բարձրաստիճան ղեկավարության հետ: Նա կհանդիպի նաեւ Ադրբեջանի նախագահի, վարչապետի եւ խորհրդարանի նախագահի հետ: