Քաղաքներից հրավերները շատ են. ինչու է ավելացել ավագանու գործուղումների բյուջեն

Նպատակն արդարացնում է միջոցները, մեր և  քաղաքային նախորդ իշխանության նպատակները տարբեր են. լրագրողների հետ զրույցում հայտարարեց Երևանի փոխքաղաքապետ Հայկ Սարգսյանը` անդրադառնալով հարցին` ինչո՞ւ են ավելացել քաղաքապետարանի աշխատակիցների արտասահմանյան գործուղումների ծախսերը, և արդյո՞ք դա չի առաջացնի երևանցիների դժգոհությունը, քանի որ նախկին իշխանությունների ամեն մի որոշումից նրանք դժգոհում էին:

«Ներկայացման և մատուցման խնդիր է: Այդ բյուջեն նախատեսված է Երևանի քաղաքապետի, ավագանու անդամների կողմից ինչպես քույր, այնպես էլ ոչ քույր քաղաքներ այցելությունների համար: Դրանց տակ հստակ դրված է ծրագիր, որևէ մեկը ինքնանպատակ չի գործուղվելու: Ես կարծում եմ` կա այն վստահությունը, որ այս միջոցներին վերաբերվելու ենք որպես մեր սեփական, անձնական միջոցների` դրանց ծախսման ասպեկտում, ուստի հաստատապես իմ գրպանից չեմ տա մեկին գումար, որ գնա շրջագայի և գա, ասի`շնորհակալություն»,- նշեց փոխքաղաքապետը:

Հարցին` երևանցիներին հարցրե՞լ են դրա մասին, նա պատասխանեց, որ երևանցիներին հարցնելու ֆորմատը պահպանվել է` բյուջեն դրվել է հանրային քննարկման: «Երևանցիները` թվով 40 հոգի, ցանկություն են հայտնել մասնակցել քննարկումներին: Այդ հանդիպման ժամանակ բոլոր հարցերը բարձրացվել են, այլ ֆորմատ, քան քաղաքացիների կարծիքը հարցնելու հանրային քննարկումներն են, հորինված չէ: Այս հարցի վերաբերյալ ևս պարզաբանում տրվել է հանրային քննարկման ժամանակ»:

Սարգսյանն ասաց, որ այս մասով բյուջեն ավելացնելու երկու գործոն կա: «Հաշվի առնելով քաղաքային նոր իշխանության գործոնը` քաղաքներից հրավերները շատ են: Երկրորդ գործոնն այն է, որ այս բյուջեն բացառապես ծախսվելու է մեզ հետ համագործակցող այլ մայրաքաղաքների և քաղաքների հետ դրամաշնորհային բանակցություններ կազմակերպելու և իրականացնելու համար»,- ասաց նա և օրինակ բերեց, որ վերջերս Ֆրանսիայի պատվիրակության այցելությունն էր Հայաստան` ի պատասխան Երևանի քաղաքապետի` Ֆրանսիա կատարած այցի, և այն քաղաքին տվեց բավականին  մեծ բյուջե` դրամաշնորհի տեսքով: