Իշխող վարչախումբն ամեն ինչ անում է՝ ընտրությունների լեգիտիմությունը ստվերելու համար. Շահնազարյան

Արտահերթ ընտրություններով որևէ լավ բան չի լինելու, քանի որ չի հաստատվելու ներքաղաքական կայունություն: Երկրորդ՝ ընտրությունների արդյունքները ներկայացնելու են այդ պահի հասարակության  քաղաքական խճանկարը, որը երեք ամիս հետո բոլորովին այլ է լինելու: Լրագրողների հետ հանդիպման ժամանակ նման տեսակետ հայտնեց ՀՀԿ նախընտրական ցուցակով առաջադրված Դավիթ Շահնազարյանը:

Ըստ նրա` խաղաղ հեղափոխությունը Նիկոլ Փաշինյանի շնորհք չէր: «Իշխող վարչախումբն ու նրա պարագլուխն անընդհատ հայտարարում են, որ թավշյա հեղափոխություն են արել, բայց դա նրանց պատճառով չի եղել, այլ եղել է բացառապես նախկին իշխանությունների որոշումը: Այս քայլը հարգանքի է արժանի, եթե որևէ մեկը կարծում է, որ իշխանություններն այնքան թույլ էին, որ չէին կարող  ուժ կիրառել, ապա չարաչար սխալվում են»,- նշեց Շահնազարյանը:

Նա ակնարկեց, որ ՀՀԿ-ի մասնակցությունն ընտրություններին լեգիտիմություն է հաղորդում, քանի որ չկա այլ ընդդիմություն, բոլորը հեղափոխական են: «Իշխող վարչախումբը և նրա ղեկավարն ամեն ինչ անում են՝ ստվերելու համար ընտրությունների լեգիտիմությունը: Տեղի է ունենում վարչական ռեսուրսի աննախադեպ կիրառում: Կրկնում եմ՝ դեկտեմբերի 9-ին մենք արձանագրելու ենք հասարակական տրամադրություններն այդ օրվա դրությամբ»,- ասաց բանախոսը:

Շահնազարյանը պնդեց, որ, երբ ՀՀԿ անդամ Արփինե Հովհաննիսյանը ներկայացրեց միջազգային չափանիշները, որոնք անտեսվում էին, դրանից հետո միայն Նիկոլ Փաշինյանը արձակուրդ է վերցրել:

Քաղաքական գործչի կարծիքով՝ Փաշինյանը քաղաքական պայքարի ընդունակ չէ, նա զբաղված է միայն  հակաքարոզչությամբ: «Այն օրը, երբ այդ սև փիարը թուլանա կամ դադարեցվի, նշանակում է, որ իշխանությունները և պարագլուխը հստակ հասկացել են, որ մեծամասնություն ունենալու խնդիր ունեն»,- ասաց նա:

Շահնազարյանին հիշեցրեցին, որ ՀՀԿ-ն արժանապատվությունից խոսելու  տեղ չունի, քանի որ տարիներ շարունակ թալանել է  երկիրը: Նա արձագանքեց. «ՀՀԿ-ն է, որ պիտի խոսի արժանապատվությունից: ՀՀ-ում առաջին անգամ իշխող քաղաքական ուժն ընդունել է իր սխալները և չի խուսափում պատասխանատվությունից»:

Հակադարձմանը՝  այդ դեպքում  ՀՀԿ-ն իր  քարոզարշավի առաջին օրն ինչո՞ւ  ժողովրդի հետ չի անցկացրել՝ մարզում կամ քաղաքում, ինչպես Նիկոլ Փաշինյանը, այլ այն նշել է մասնավոր  միջոցառմամբ, և  որ նախկին իշխանությունների սխալները չպետք է մոռանալ,  Շահնազարյանը պատասխանեց՝ ՀՀԿ-ի մեծագույն  սխալը եղել է այն, որ կտրված է եղել իրականությունից,  իսկ լավ քայլը նրա վարած արտաքին քաղաքականությունն է եղել: Ավելին՝ այսօրվա քաղաքացիական սեկտորը կայացել է վերջին 10 տարում: