Չենք կարող այս կամ այն երկրից լավ բաները վերցնել, այդպես երկիրը աջաբսանդալ կդառնա. Դավիթ Հարությունյանը` կառավարությանը

Այսօր ԱԺ-ում լրագրողների հետ զրույցում արդարադատության նախկին նախարար, ԱԺ-ում ստեղծված Ընտրական օրենսգրքի աշխատանքային խմբի անդամ Դավիթ Հարությունյանն ասաց, որ իրենք պատրաստ են մեկ տարում գնալ արտահերթ ընտրությունների:

Հարցին, թե ասում են՝ մեկ տարի հետո անցկացնելը ՀՀԿ-ին ձեռնտու չէ, անցողիկ շեմը չի կարողանա հաղթահարել, նա չարձագանքեց:

Հարությունյանն անդրադարձավ կառավարության կողմից ներկայացվող առաջարկներին` անցողիկ շեմն իջեցնել մեկ տոկոսով և անցում անել ամբողջական համամասնական ընտրակարգին:

«Խորհրդարանական համակարգերում շատ կարևոր է, որպեսզի լինի կայուն խորհրդարանական մեծամասնություն, ընտրական շեմի նվազեցումը հակառակ ուղղությամբ է տանում պրոցեսը, և ես ուզում եմ հասկանալ, թե ո՞րն է եղել խնդիրը: Կարելի է այս մի երկրի օրենսդրությունից վերցնել մի հատված, այն մյուս երկրի, բայց պետք է հասկանալ ստրուկտուրան, թե ինչի համար ենք մենք դա անում: Եթե մենք պլանավորում ենք հրաժարվել խորհրդարանական մոդելից, ես կարող եմ դա հասկանալ, եթե պլանավորում ենք անցում կատարել նախագահական կամ կիսանախագահական կառավարման համակարգի, բայց կարծես թե այս պահին նման խնդիր դրված չէ, այդ դեպքում ինձ պետք է հասկանալ` ինչո՞վ է պայմանավորված այդ առաջարկությունը»,- ասաց նա:

Դիտարկմանը` կայուն մեծամասնությունը դաշինքով կլինի, Դավիթ Հարությունյանն արձագանքեց, որ այլ երկրների փորձ կա: «Երկրներ կան, որ ընտրական շեմ են բարձրացնում, երկրներ կան, որ բոնուսային համակարգ ունեն, տարբեր մոդելներ կան: Մինչև չհասկանամ առաջարկության նպատակը, դժվար է հընթացս տալ գնահատական»,- նշեց նա:

Դավիթ Հարությունյանն ասաց, որ կուսակցությունների համակարգը մեր երկրում կայացած չէ, ու հարց է, թե մենք սրանով խթանո՞ւմ ենք նրանց կայացումը, թե՞ նոր կուսակցությունների ստեղծումն ենք խթանում: «Եթե գոնե լիներ, որ տարիներ շարունակ կուսակցությունների կազմն անփոփոխ է, և ժամանակն է թարմ արյուն մտցնելու խորհրդարան, այդ գաղափարը կընդունեի: Բայց դրդապատճառները պարզ չեն: Առանց դրդապատճառի մտցնել և ներմուծել ինչ-որ գաղափար` շատ արհեստական է»,- ասաց նա:

Ինչ վերաբերում է փակ ցուցակներով ընտրություններին, Դավիթ Հարությունյանն ասաց, որ ՀՀ-ի ապագան հենց այն ընտրական մոդելն է, որը ներկայումս գործում է, սակայն այն, բնականաբար, ցույց կտար իր հմայքը ոչ թե հընթացս, միանգամից, առաջին ընտրության ժամանակ, այլ մեկ, երկու, երեք ընտրական ցիկլերի ընթացքում:

«Ես հասկանում եմ, որ այս համակարգը բացասական տարրեր ունի, հատապես` այն կուսակցությունների համար, որոնք տարածքներում չունեն բաժանումներ: Այդ կուսակցություններն ունեն խնդիր: Պետք է բոլոր դրական և բացասական կողմերը համադրենք ու փորձենք գտնել առավել օպտիմալ լուծում»,- նշեց նա:

Դավիթ Հարությունյանը նշեց, որ չպետք է թույլ տալ, որ կուսակցությունները դառնան փակ կառույցներ, որտեղ կուսակցության վերնախավը, նախագահը որոշեն կուսակցականների հերթականությունը, դա վտանգավոր է, և դա երբևէ թույլ չի տա, որ ձևավորվեն իսկապես ժողովրդավարական կուսակցություններ:

«Կարծում եմ` ժողովուրդը պետք է ազդեցություն ունենա այդ առումով: ՀՀ-ի համար ամենավտանգավոր մոտեցումը կլիներ, եթե հատուկ միջոցներ չձեռնարկվեն, որ քաղաքականությունը նաև մարզեր տեղափոխվի, առանց այդ էլ գերկենտրոնացրել ենք Երեւանում»,- հավելեց նա:

Հարությունյանն ասաց, որ չեն կարող այս կամ այն երկրից «լավ բաները» վերցնել ու շիլաշփոթ դարձնել: «Եթե էդպես լինի, մեր երկիրը կդառնա ուղղակի աջաբսանդալ, ավելի վատ՝ շատ խայտաբղետ Ընտրական օրենսգիրք»,- կարծիք հայտնեց նա:

Ըստ Հարությունյանի`  համամասնական ընտրակարգն ունի հարյուրից ավելի տեսակներ, և կարող են գտնել միջանկյալ լուծումներ: