Ինչ է խորհուրդ տրվում անել շոգ եղանակին

Շոգ եղանակին օդի բարձր ջերմաստիճանի, ուլտրամանուշակագույն ճառագայթման բացասական ազդեցությունը մեղմելու, օրգանիզմի անցանկալի գերտաքացումը կանխելու նպատակով՝ ՀՀ Առողջապահական և աշխատանքի տեսչական մարմինը կոչ է անում բնակչությանը.
• Խուսափել արևի ուղիղ ճառագայթներից` հատկապես օրվա ժամը 12:00-17:00, հնարավորինս գտնվել ստվերում,
• ամենօրյա աշխատանքները կատարել օրվա համեմատաբար զով ժամերին,
• ուլտրամանուշակագույն ճառագայթումից պաշտպանվելու համար կրել գլխարկ, արևային ակնոցներ, հովանոց, հագնել բաց գույնի, բամբակյա կտորից, ազատ, օդաթափանց հագուստ,
• օգտագործել բավարար քանակությամբ հեղուկներ, (սիրտ-անոթային կամ միզասեռական համակարգի հիվանդություններով տառապող անձինք հեղուկներ պետք է ընդունեն իրենց բուժող բժշկի հետ խորհրդակցելուց հետո),
• զերծ մնալ կոֆեին և շաքար պարունակող ըմպելիքների չարաշահումներից,
• խորհուրդ է տրվում տարածքները մշտապես օդափոխել, խուսաբել արևի տակ կայանված փոխադրամիջոցներում երկար ժամանակ մնալուց, 
• հետևել, որ օդափոխիչը կամ օդորակիչն ապահովի օդափոխությունը՝ բացառելով սառը օդի հոսանքի անմիջական ուղղվածության տակ գտնվելը,
• հագնվել ջերմաստիճանին համապատասխան այն տարածքներում, որտեղ առկա են օդորակիչներ, 
• լողափին արևային լոգանքների սկզբնական տևողությունը սահմանել 15 րոպեից ոչ ավել, այնուհետև աստիճանաբար ավելացնել,
• առավել ուշադիր լինել երեխաների, մեծահասակների և սիրտ-անոթային հիվնադություններ ունեցող անձանց նկատմամբ: 
Ամռան տապին վերընշված խորհուրդները չպահպանելու դեպքում հնարավոր է արևահարության ի հայտ գալը:
Արևահարությունը՝ գլխի անպաշտպան մակերեսին բարձր ջերմաստիճանի երկարատև ազդեցության հետևանքով գանգուղեղի աշխատանքի խանգարում է, որի ախտանշաններն են՝
• անզուսպ փսխում, 
• սաստիկ գլխացավ, 
• մարմնի ջերմաստիճանի բարձրացում, 
• սրտի բաբախման արագացում (պուլսը՝ 120-140), 
• դժվարացած շնչառություն, 
• անտարբերություն շրջապատի հանդեպ,
• քրտնարտադրության բացակայություն,
• մկանային կծկանքներ,
• ապակողմնորոշում, 
• ծանր դեպքերում հնարավոր են հալյուցինացիաներ, զառանցանք, ուշագնացություն: 
Առաջին օգնություն. Նման դեպքերում նախ և առաջ անհրաժեշտ է կանչել շտապ օգնություն, իսկ մինչ վերջինիս գալը անհրաժեշտ է ձեռնարկել հետևյալ միջոցառումները՝
• տեղափոխել տուժածին ստվեր
• հնարավորինս ազատել նրան հագուստից և փաթաթել զով ջրով թրջվաց սավանով
• հովացնել տուժածին զով ջրով, տալ խամելու զով ջուր,
• եթե տւժածը ուշագնաց է, ապա անուշադրի սպիրտով ուշքի բերել, այնուհետև տալ խմելու սառը ջուր կամ հանքային ջուր:

ՀՀ ԱՆ առողջապահական տեսչական մարմին