Հայադարձության հարց ենք դրել. Հրանուշ Հակոբյան

Ազգային ժողովում «ՀՀ-Սփյուռք գործակցության զարգացումները» թեմայով աշխատանքային խորհրդակցության ժամանակ ԱԺ «Ելք» խմբակցության պատգամավոր Արտակ Զեյնալյանը Սփյուռքի նախարար Հրանուշ Հակոբյանից հետաքրքրվեց` այս պահին 7 մլն հայ ունենք Սփյուռքում, ինչպե՞ս է Սփյուռքը հյուծվում, 10 տարի հետո որքա՞ն մարդ կունենանք Սփյուռքում:

Հակոբյանը պատասխանեց, որ սա շատ բարդ հարց է և կապված է աշխարհում տեղի ունեցող իրադարձությունների հետ: «Երկրաշարժը եղավ, շատերը ցնցվեցին և վերադարձան իրենց արմատներին: Ապրիլյան պատերազմի ժամանակ էլ եղան մարդիկ, ովքեր ընդմիշտ հեռացել էին, վերադարձան: Ակնհայտ է, որ մենք համախմբվում ենք ցավի ու վտանգի պահին: Ինչպես երջանկահիշատակ Վիգեն Հովսեփյանն ասաց՝ մեկ օրում ազգ դարձանք»,- ասաց նա:

Նախարարն օրինակ բերեց բարերար Քրք Քրքորյանին: Նրա խոսքով` Քրքորյանն ընդհանրապես հայության հետ կապ չուներ, հենց երկրաշարժը եղավ, մարդու մեջ խոսեց հայ լինելու ցանկությունը:

«Մենք հայադարձության հարց ենք դրել, ոչ թե` հայրենադարձության, և հորդորում ենք համայնքներին, որ զբաղվեն այն հայերով, ովքեր հեռացել են հայ լինելուց»,- նշեց Հրանուշ Հակոբյանը: