Սփյուռքահայի համար անսովոր է, որ մենք, խալաթով, բիգուդիները գլխներիս, աղբ թափելու ենք գնում. Հրանուշ Հակոբյան

Երբ սփյուռքահայերը գալիս են Հայաստան, սկզբում նրանց համար մի քիչ անսովոր երևույթներ են լինում, օրինակ` նրանց համար անհավանական է, որ մենք, խալաթով և բիգուդիները գլխներիս, աղբ թափելու ենք գնում: Այսօր ԱԺ-ում լրագրողների հետ զրույցում ասաց Սփյուռքի նախարար Հրանուշ Հակոբյանը:

Նա նշեց, որ «հայրենադարձություն» տերմինը մի քիչ սխալ ենք մեկնաբանում: Ըստ նախարարի` հայրենադարձությունը ոչ թե միայն այն է, որ դրսի հայերը գան ու 366 օր այստեղ ապրեն, այլ նաև նրանք են հայրենադարձված, ովքեր Հայաստանում բնակարան են գնում, բիզնես սկսում, տարեկան 4-5 անգամ այցելում Հայաստան:

«Դրսում ապրողները, ի տարբերություն մեզ, ավելի լավատես են: Սփյուռքահայերին մեր երկրում առաջին հերթին գրավում է անվտանգության հարցը. ամենամեծ գրավիչ մասն այն է, որ գիշերը 10-ից հետո հանգիստ զբոսնում են քաղաքում: Երկրորդ գրավիչ բանը դպրոցներն են. մեր դպրոցներում չկան այն վատ սովորույթները, որը, ցավոք, տարբեր երկրների դպրոցներում առկա են»,-ասաց նախարարը:

Իսկ թե իր պաշտոնավարման ժամանակ քանի՞ հայ ընտանիք է Հայաստանում բնակություն հաստատել, Հակոբյանը նշեց, որ վիճակագրական տվյալներ չունեն, պետք է ԱՎԾ-ին դիմել: